Nursultan Nazarbaev týraly jańa kitap jaryq kórdi
Qazaqstan halqy Assambleıasynyń bastamasymen jaryq kórgen bul jınaq QHA Tóraǵasy, qazaq elindegi qoǵamdyq kelisim men jalpyulttyq birliktiń avtory Nursultan Nazarbaevqa arnalǵan.
«Qazaqstan Halqy Assambleıasy osy tarıhı sátke erekshe mán berdi. Bul sharany ádettegi jınalys emes, qoǵamdyq kelisim men jalpyulttyq birlikti aıqyndaıtyn, jasampaz ıdeıalary bar qaıtalanbas shyǵarmanyń kópshilik nazaryna usynylǵan kúni dep qabyl etińizder. El tarıhynda Assambleıanyń qurylýy mańyzdy turaqtandyrýshy faktor bolyp qalyptasty. Esterińizde bolar, 1995 jyly Qazaqstannyń saıası júıesi ózara úılesimsizdik saldarynan qıyn daǵdarysqa tap boldy. Osy kezde, Elbasynyń sheshimimen Assambleıa qurylyp, onyń halyqqa tikeleı nazar aýdarýyna jol ashyldy. Osylaısha, bılik pen qoǵam arasyndaǵy izgiliktiń kópiri ornady. Bul saıası qadamdaǵy Nursultan Ábishulynyń sara joly eshqashan umytylmaıdy», - dedi QHA Tóraǵasynyń orynbasary Janseıit Túımebaev kitaptyń tusaýkeser rásiminde.
Onyń aıtýynsha, keńes berýshi organ retinde qurylǵan Assambleıa, kitapta aıtylǵandaı «jalpyulttyq dıalogtyń alańyna» aınaldy.
«Qazaqstandy reformalaý men damytýdyń ózekti máseleleriniń barlyǵynda Assambleıanyń úni boldy. Búgingi tańda Assambleıanyń bastamasy arqasynda, bizdiń ómirimizde Saıası qýǵyn-súrgin men ashtyq qurbandaryn eske alý, Alǵys aıtý kúni, Qazaqstan halqynyń birligi kúni sekildi uǵymdar paıda boldy. Osy atalǵan rýhanı isterdiń barlyǵy, óziniń bastaýyn Assambleıa sessııalarynan alady», - dep óz sózin jalǵastyrdy J. Túımebaev.
Sondaı-aq, QHA Tóraǵasynyń orynbasary kóptegen álemdik saıasatkerler men halyqaralyq sarapshylardyń qazaqstandyq beıbitshilik úlgisin joǵary baǵalaǵanyn jetkizdi. BUU Bas hatshylary Kofı Annan men Pan Gı Mýn QHA men BUU jumysy men ustanymdaryn uqsatqan bolatyn. Al reseılik ulttyq strategııa ınstıtýtynyń halyqaralyq baǵdarlamalar boıynsha dırektory ıÝrıı Solozobov Assambleıany etnıkalyq ókildiktiń jańa túri dep sıpattady.
«Elbasy Nursultan Nazarbaev pen Prezıdent Qasym-Jomart Toqaevtyń salıqaly saıasaty elimizde turyp jatqan barlyq etnostarǵa teńdeı jaǵdaı jasap, birdeı quqyqtyq erkindik berýde. Qazaqstanda turyp jatqan barlyq halyq pen etnosaralyq toptar – bizdiń elimizdiń rýhanı baılyǵy. Elbasy atap ótkendeı, jahandyq álem transformatsııany bastan keshirýde. Ekonomıka, qoǵam ómiri, tehnologııa túbegeıli ózgerýde. Biz bul ózgeristerdi qabyldaımyz jáne kóp nársege úırenemiz. Qoǵam birligi men etnosaralyq kelisim ótpeli kezeńde turaqty ári túbegeıli qundylyq bolyp qalady», - dedi QR Mádenıet jáne sport mınıstri Aqtoty Raıymqulova.
Jınaq úsh taraýdan quralǵan. Onyń alǵashqy bóliginde QHA Tóraǵasy Nursultan Nazarbaevtyń 1995-1999 jyldary sóılegen sózderi berilgen. «Jeńis pen jetistikke jigerlendirýshi» taraýynda Nursultan Nazarbaevtyń qasynda qyzmet etken jandardyń, QHA músheleriniń Elbasy týraly buqaralyq aqparat quraldarynda jaryq kórgen jarııalanymdary toptastyrylǵan. Úshinshi taraýda «Halqynyń Elbasyna aq tilegi» ataýymen etno-mádenı birlestik ókilderiniń Elbasý týraly pikirleri jınaqtalǵan. Sondaı-aq, kitapqa Elbasynyń jeke arhıvinen alynǵan jáne kitaphana qorynda saqtalǵan qundy sýretter men qujattar engen.
«Elbasy jáne halqy» kitaby myń danamen jaryq kórgen. Kitaptar respýblıka kitaphanalaryna joldanady.
