Nursultan Nazarbaev bizge sara jol kórsete beretinine bek senimdimiz - depýtat Ómirzaq Meldehanov

TÚRKІSTAN. QazAqparat - Túrkistan oblystyq máslıhatynyń depýtaty Ómirzaq Meldehanov Naýryz merekesi qarsańynda Nursultan Nazarbaevtyń óz ókilettiligin merziminen buryn toqtatýy búkil qazaqstandyqtar úshin kútpegen jańalyq bolǵanyn aıtady. Halyq qalaýlysy bul tarıhı sheshimdi óte aqyldy, dana adamdar ǵana qabyldaı alatynyn jetkizdi, dep habarlaıdy QazAqparat tilshisi.

Ómirzaq Meldehanov pikirinshe Elbasynyń óz ókilettiligin Qasym-Jomart Toqaevqa tapsyrýy - ustazdyń óz shákirtiniń jańa qadamyn syrttaı baqylaý arqyly kóregendilik isi jasaýy.

«Árıne, qaı ustazǵa da shákirtiniń bıik belesterge shyqqany qýanyshty. Bul rette Elbasy ózi sengen izbasarynyń jańa kúndi nemen, qandaı jumystarmen bastaıtynyn kórgisi kelgen shyǵar. Nurekeńniń ulylyǵy da osynda. Demek, uly ustaz ulaǵattylyq tanytyp otyr. 2018 jyldyń jazynda Qazaqstan Respýblıkasy Senatynyń tóraǵasy Qasym-Jomart Toqaev «Bı-Bı-Sı» arnasyna bergen suhbatynda «Shynymdy aıtsam, men Memleket basshysy Nursultan Nazarbaev 2020 jyly prezıdenttik saılaýǵa túsetinine senbeımin. Óıtkeni, ol óte aqyldy ári parasatty adam. 2020 jyly prezıdenttik saılaýǵa qatyssa da, qatyspasa da syrtqy jáne ishki saıasatqa katysty máselelerdiń núktesin ózi qoıady» degeni jadymyzda. Iá, búgingi Memleket basshysynyń mindetin ýaqytsha atqarýshy Qasym-Jomart Kemelulynyń kemeldigi osynda jatyr», - deıdi oblystyq máslıhat depýtaty.

Halyq qalaýlysynyń aıtýynsha, parasatty adamnyń parasatty sheshim qabyldaıtynyn odan basqa esh adam aıtqan da, bilgen de joq.

«Nurekeń ózi aıtqandaı, kezekti saılaýǵa deıin Q.Toqaevtyń el basqarý isinde jańa qyrynan kórinetinine senemiz. Óıtkeni, onyń ómir joly bizge jaqsy tanys. Elbasy senimin arqalap júrgen saıası tulǵa bul jaýapkershilikti de abyroımen alyp ótedi. Nursultan Ábishuly Qaýipsizdik keńesiniń tóraǵasy, «Nur Otan» partııasynyń tóraǵasy retinde de bizge sara jol kórsete beretinine bek senimdimiz»,-deıdi Ómirzaq Meldehanov.