Nursultan Nazarbaev «Bir beldeý, bir jol» atty forýmǵa qatysady
Kezdesý barysynda Qazaqstannyń Tuńǵysh Prezıdenti eki memleket arasynda ornyqqan qarym-qatynastyń joǵary deńgeıde ekenin atap ótip, ony ári qaraı damytýdyń perspektıvalaryna toqtaldy.
- Sizben júzdeskenime qýanyshtymyn. Tóraǵa Sı Tszınpınniń birlesken jumystarymyzdyń nátıjeleri men perspektıvalary talqylanatyn «Bir beldeý, bir jol» atty forýmǵa qatysýǵa shaqyrýyn rızashylyqpen qabyl aldym. Sonymen qatar, biz jeti jyl boıy ózara túsinistik rýhynda birlese jumys istegen Qytaı Halyq Respýblıkasynyń Tóraǵasymen kelissóz ótkizý josparlanyp otyr, - dedi Nursultan Nazarbaev.
Qazaqstannyń Tuńǵysh Prezıdenti kólik-logıstıka salasyndaǵy birlesken jobalardy iske asyrýdyń tıimdiligin aıtty.
- Biz ınfraqurylymdy damytý jóninde aýqymdy jumys atqardyq. Biz Qytaı Halyq Respýblıkasymen jemisti yntymaqtastyqty óte joǵary baǵalaımyz jáne bul ózara tıimdi qatynastardy jalǵastyra beremiz, - dedi Elbasy.
Sonymen qatar, Nursultan Nazarbaev barsha Qytaı halqyn Qytaı Halyq Respýblıkasynyń 70 jyldyǵymen quttyqtap, zor tabys jáne baq-bereke tiledi.
Elshi Chjan Sıao Nursultan Nazarbaevqa Qytaı Halyq Respýblıkasynyń Tóraǵasy Sı Tszınpınniń zor iltıpatyn jetkizdi.
- «Bir beldeý, bir jol» atty ekinshi forým - 37 memleket pen úkimetterdiń basshylary qatysatyn aýqymdy halyqaralyq shara. Qatysýshylardyń ishinde Siz, Nursultan Ábishuly, bul is-sharanyń eń mańyzdy ári qurmetti qonaǵy bolasyz, - dedi QHR elshisi.
Chjan Sıao «Bir beldeý, bir jol» bastamasy men «Nurly jol» jańa ekonomıkalyq saıasattyń túıindesýiniń jemisti bolǵanyn atap ótti.
- Búginde birlesken 55 jobanyń 9-y júzege asyryldy. Osy jyldyń ishinde taǵy 8 jobany aıaqtaý josparlanýda. Yntymaqtastyǵymyzdyń jemisti bolýy, eń aldymen, Sizdiń sińirgen zor eńbegińizdiń arqasy, - dedi QHR elshisi.
