Nursultan Nazarbaev Astanada ındýstrııalyq damý baǵdarlamasyn júzege asyrý kezinde salynǵan birqatar nysanda boldy

ASTANA. QazAqparat - Keshe Memleket basshysy Nursultan Nazarbaev Astanada ındýstrııalyq damý baǵdarlamasyn júzege asyrý kezinde salynǵan birqatar nysanda boldy, dep jazady «Egemen Qazaqstan» gazeti.

Memleket basshysy aldymen «Astana» kólik-logıstıka orta­lyǵyna bardy. Onda orta­lyq jumysymen tanysyp, jeńil­detilgen kedendik resimdeý aıma­ǵyn kórdi. Jalpy aýmaǵy 46 gek­tar «Astana» kólik-logıstıka orta­lyǵy termınaldyq óńdeý ın­fraqurylymy bar Qazaqstandaǵy «A» sanatyndaǵy iri ortalyq bolyp otyr. Bul halyqaralyq jáne res­pýblıkalyq júk aǵymy­na qyzmet kórsetý, sondaı-aq, taýar­lardyń qala men óńirlerge taratylýy úshin qoıma jáne ilespe qyzmetter usyný maqsatymen quryldy. Ortalyqtyń qoıma keshen­deri qoıma sharýashylyǵyn júrgi­zýdiń zamanaýı talaptaryna saı keledi jáne tıeý-túsi­rý aımaǵynyń ótkizý qabiletin kú­nine 1000 palletke deıin art­ty­rýǵa múmkindik beretin jańa qu­rylǵylarmen jabdyqtalǵan. Jobany iske asyrý aıasynda Astana men Shymkentte logıs­tı­kalyq ortalyqtar jelisin qurýdan basqa, Qorǵas, Aqtóbe, Almaty já­ne Pavlodar qalalarynda kó­lik-logıstıka keshenderin salý jáne iske qosý kózdelgen.

Prezıdent orta­lyq­ty aralaǵan soń kásiporyn­nyń eńbek ujymy ókilderimen júzdesti. Olarmen áńgime barysynda Elbasy eldiń ındýs­trııalyq damýynda kólik-logıs­tıka qyzmetteri naryǵy mańyzdy ról atqaratyndyǵyna toqtaldy.

«Syrtqy ekonomıkalyq qyz­met ókilderi buryn qujattaryn úsh táýlikte resimdeıtin, al munda ol jeńildetilgen, 1 saǵattan 3 sa­ǵatqa deıin ǵana ýaqyt alady. Biz Astanada taýar óńdeý jóni­nen Ortalyq Azııa ǵana emes, Kav­kaz ben Sibirdi qosa alǵan­da eń iri logıstıkalyq hab sal­dyq. Ol qazirdiń ózinde 70 paıyz júktememen jumys istep tur. Bul - bizdiń ındýstrııa­lyq baǵdarlamamyz ben ınfra­qurylymdyq damýymyzdaǵy aýqymdy is», dedi N.Nazarbaev.

Budan soń Memleket basshysy «GLB» úı qurylysy kom­bı­natynda boldy. Memleket bas­shy­sy nysandy aralaý bary­synda kombınattyń armatýra jáne qalyptaý tsehtarynyń jumysymen tanysty, sondaı-aq, kórme pavılonyn qarap shyqty. Nursultan Nazarbaev memlekettik turǵyn úı baǵdar­lamasyn júzege asyrý barysyn­da kásiporynnyń óndiristik qýatyn keńinen paıdalaný qa­jettigine nazar aýdardy. Elbasy 1200-ge jýyq adamdy jumys orny­men qamtamasyz etip otyr­ǵan kom­bınattyń áleýmettik mańy­zyn aıryqsha atady.

Óndiristik 8 tsehtan turatyn «GLB» úı qurylysy kombınaty iri paneldi jáne karkas-jınaqtaý qurylysy úshin temir-beton buıymdarynyń barlyq túrin shyǵarady. Joba «Bıznestiń jol kartasy-2020» baǵdarlamasy aıasynda iske asyryldy.

Jalpy aýmaǵy 15 gektardy qam­tıtyn kásiporyn Germanııa men Avstrııada shyǵarylǵan zama­naýı joǵary tehnologııalyq qurylǵylarmen jabdyqtalǵan. Kombınattyń jetildirilgen tehnologııalyq úderisi jylyna qurylys nysandarynyń 250 myń sharshy metrge deıingi aý­maq ónimdiligin qamtamasyz etedi.

Ónimdi iske asyrý kólemi jóninen jylyna 130 000 tekshe metr temir-beton buıymdary óndiriledi. Elbasy, sondaı-aq, «Tulpar-Talgo» JShS-tiń jolaýshy­lar vagonyn shyǵa­ratyn zaýyt­ta da boldy. Onda zaýyt­tyń ındýstrııalyq parki jumy­sy­men tanysty. Prezı­dentke temirjol mashınalaryn jasaý salasynyń ósim qarqyny men júrdek qozǵalysty damytý baǵdarlamasy týraly baıandaldy.

Kásiporynnyń óndiristik oryn­­jaılarynyń jalpy aýmaǵy - 31 myń sharshy metr, óndiristik qýaty - jylyna 150 vagon. Eý­ropalyq sapa standarttaryna saı ozyq tehnologııalar men mate­rıaldardy qoldaný poıyzdyń sa­ǵatyna 200 shaqyrymǵa deıin­gi jyldamdyqpen júrýin qamta­masyz etedi. Vagondardyń paıda­lanylý merzimi - 40 jyl. 2012-2015 jyldar aralyǵynda «Jo­laýshylar tasymaly» AQ úshin 436 vagon jasalyp, jetkizilgen. Ótken jyly shanaǵynyń eni keńeıtilgen vagondar óndirisi qolǵa alynypty. 2020 jylǵa deıin osyndaı serııaly 603 vagon shyǵarý josparlanǵan. Osy ret­te Memleket basshysy eldiń kó­lik júıesiniń tıimdiligin arttyrý úshin óndiristi odan ári ul­ǵaıtý qajettigin aıtty.

«Qurylysy jóninde Ispa­nııa Koroli Hýan Karlospen kóp jyl buryn men kelisken Talgo vagon­daryn shyǵarý zaýytynyń ónimderi elimizde keńinen paıdalanyla bastady. Biz temirjol salasy úshin elektrovozdar men teplovozdar ǵana emes, zamanaýı júk jáne jolaýshylar vagondaryn da jasaımyz. Qazir olar túrli baǵyttarda jolaýshy tasıtyn júrdek poıyzdarda paıdalanylady. Jalpy, Astananyń ındýstrııalyq parki qarqyndy damyp keledi. Biz osy tehnologııalyq parkke ınvestıtsııa tartyp, jobalardy tabysty júzege asyrý úshin jaǵdaı jasap jatyrmyz. Sonyń arqasynda qala ekonomıkasy damyp, jyl saıyn bıýdjet túsimderi ulǵaıyp keledi», dedi Nursultan Nazarbaev.

Budan ári Memleket basshysy Olımpıadalyq sý sporty ortalyǵyna bardy. Qazaqstan Pre­zıdenti elordanyń kóp­fýnk­­tsııaly muz saraıynda orna­lasqan jańa ortalyq ǵıma­ratyn aralap, jumysymen tanysty. Іs-shara aıasynda sý sporty ókilderi kelýshiler nazaryna tramplınnen sýǵa sekirý, mánerlep júzý jáne sý polosy oıynyn usyndy.

Álemdik sapa standarttaryna sáıkes salynyp-jabdyqtalǵan sport ǵımaraty halyqaralyq aýqymdy jarystar ótkizýge ar­nalǵan jáne tolyqqandy oqý-jattyǵý úderisine jaǵdaı jasal­ǵan­dyǵymen erekshelenedi. Taıaýda Olımpıadalyq ortalyqta Qazaqstan Respýblıkasynyń sýǵa sekirý, mánerlep júzý, sý po­losy jáne júzý boıynsha ult­tyq qurama komandalary daıyn­dyq ótkizedi dep josparlanýda.

Elbasy, sonymen qatar, «Forte Bank» aktsıonerlik qoǵamy ǵı­maratyna da bardy. Memleket basshysy banktiń jańa keńselik orynjaılaryn kórdi, sondaı-aq, qarjy uıymyn odan ári damytý jónindegi jos­parmen tanysty. «Forte Bank» AQ qurylys ýchaskesiniń jalpy aýmaǵy - 2 gektar. Bas ǵı­ma­rattyń ınfraqurylymyna art-galereıa, VIP-bólimshe, WorkCafe, fıtnes ortalyǵy, aýdıtorııa jáne terrassa kiredi. Fılıal ǵımaratynda jeke jáne zańdy tulǵalarǵa qyzmet kórsetý aımaǵy, sondaı-aq, bank qyzmetkerlerine arnalǵan keńseler ornalasqan.

Dınara BІTІKOVA,

«Egemen Qazaqstan»