«Nurly jer» memlekettik baǵdarlamasyna ózgerister engiziledi

NUR-SULTAN. QazAqparat – Elimizde qurylys ındýstrııasyn damytý jónindegi is-sharalar jospary ázirlenedi. Bul týraly búgin turǵyn úı saıasatynyń jańa tásilderi qaralǵan Úkimet otyrysynda QR Premer-Mınıstri Asqar Mamın aıtty, dep habarlaıdy QazAqparat tilshisi.

Otyrysta Úkimet basshysy Indýstrııa jáne ınfraqurylymdyq damý mınıstrligi usynǵan tásilderdi qolaıtyndyǵyn aıta kele birqatar máselege nazar aýdartty.

«Birinshi. Jańa tásilderdi tıimdi iske asyrý úshin tıisti zańnamalyq túzetýlerdi tezdetip qabyldaý kerek. Indýstrııa mınıstrligine osy jylǵy 25 naýryzǵa deıin tıisti zań jobasyn Úkimetke engizýdi tapsyramyn. Zańnamalyq túzetýlerdi qabyldaǵannan keıin «Nurly jer» memlekettik baǵdarlamasyna da tıisti ózgerister engizý qajet», - dedi Asqar Mamın.

Premer-Mınıstr ekinshiden, barlyq óńirlerdiń ákimdikteri bólinetin qarajatty bıyl tolyq ıgerip, turǵyn úıdi paıdalanýǵa berý boıynsha barlyq kórsetkishterge qol jetkizýi qajettigin eskertti.

«Óńirlerde qurylys maýsymyn ýaqtyly bastaýdyń mańyzy zor. Jer ýchaskelerin ýaqtyly bólý jáne olarǵa qajetti ınfraqurylymdy jetkizip, tıisti jobalyq qujattamanyń daıyn bolýyn qamtamasyz etý qajet. Úshinshi. Turǵyn úıdi paıdalanýǵa berý kólemi ósken saıyn qurylys materıaldaryna qajettilik te artady. Osy rette, otandyq qurylys materıaldaryn óndirýdi odan ári belsendi damytý kerek. Mysaly, jeke ınvestorlardyń esebinen jalpy quny 63 mlrd teńgeden asatyn birneshe jobalar iske asyrylatyn bolady», - dedi ol.

Úkimet basshysy sendvıch-panelder, konstrýktsııalar, qasbettik plıtalar, jylý oqshaýlaý materıaldaryn óndiretin jobalardy iske asyrý josparlanyp otyrǵanyn aıtty.

«Bul baǵyttaǵy jumysty jalǵastyrý kerek. Indýstrııa mınıstrligine «Samuryq-Qazyna» holdıngimen jáne «Atameken» palatasymen birlesip, osy jylǵy 15 naýryzǵa deıin Qurylys ındýstrııasyn damytý jónindegi is-sharalar josparyn Úkimetke engizýdi tapsyramyn», - dedi Premer-Mınıstr.