Nur-Sultanda «Sýbkontrakt bırjasy – 2021» sharasy ótedi

NUR-SULTAN. QazAqparat - 24 qyrkúıekte Nur-Sultan qalasynda QazIndustry óńdeý ónerkásibi aptalyǵy barysynda eki is-shara ótkizedi: «Sýbkontrakt bırjasy – 2021» jáne «Tapsyrys berýshilerdiń kásibı qyzmetterdi satyp alýy: máseleleri men bolashaǵy» konferentsııasy.

Іs-sharalarǵa iri jer qoınaýyn paıdalanýshylar, júıe quraýshy kásiporyndar, otandyq óndirýshiler, ulttyq kompanııalar, memlekettik organdar men damý ınstıtýttarynyń ókilderi qatysady, dep habarlaıdy QazAqparat QR Indýstrııa jáne ınfraqurylymdyq damý mınıstrliginiń Telegram kanalyna silteme jasap.

Qosalqy kelisimsharttar bırjasy barysynda kooperatsııalyq baılanystardy jolǵa qoıý, jańa áriptester men jańa naryqtardy izdeý, otandyq ónimniń básekege qabilettiligin arttyrý jáne B2B baılanystaryn qalyptastyrý úshin tapsyrys berýshiler men ónim berýshiler arasynda tikeleı kelissózder júrgiziletin bolady.

«QazIndustry» Qazaqstandyq ındýstrııa jáne eksport ortalyǵy» AQ ónerkásiptik kooperatsııa ortalyǵynyń dırektory Baýyrjan Qalen atap ótkendeı, sýbkontrakt bırjasy – birinshi kezekte otandyq óndirýshi úshin iri tapsyrys berýshiler aldynda áleýetin tanystyrýǵa, tıimdi óndiristik tizbekterdi qurýǵa jáne eń bastysy – uzaq jáne turaqty baılanystardy ornatýǵa múmkindik beretin tıimdi alań.