Nur-Sultanda shirkeý tonaldy

NUR-SULTAN. QazAqparat – Elordadaǵy Serafım ǵımabadathanasynyń burynǵy kúzetshisi sybaılasymen birge qaıyrymdylyq jáshikterin urlap ketti. Bul týraly Nur-Sultan qalasy Polıtsııa departamentiniń baspasóz qyzmeti málimet taratty, dep habarlaıdy QazAqparat tilshisi.

Polıtsııa ókilderiniń aıtýynsha, urylar nysanǵa tún ortasynda terezeni syndyryp kirgen.

«Urlyq tún ortasynda jasalǵan. Kúdiktiler jertóle terezesin shaǵyp, shirkeýge kirgen. Sodan keıin arnaıy bólmeniń esigin syndyryp, qaıyrymdylyq jınaýǵa arnalǵan 6 qoraptan 170 myń teńgeni urlap ketken. Oqıǵa týraly málimetti polıtsııaǵa Serafım ǵıbadathanasynyń dinı qyzmetkeri tańerteń habarlady. Polıtsııa qyzmetkerleri táýlik ishinde 27 jastaǵy eki jigitti ustady. Olardyń bireýi buryn shirkeýde kúzetshi bolyp jumys istegen. Kúdiktiler qylmys jasaǵandaryn moıyndady. Qazir «Urlyq» baby boıynsha sotqa deıingi tergeý júrip jatyr», - dep jazady departamenttiń baspasóz qyzmeti.

Kúdiktiler urlanǵan aqshany jumsap úlgergenderin aıtqan. Polıtsııanyń málimetine sensek, bul jup buryn da qylmys jasaǵan.

«2019 jyly kúdiktiler urlyq jasaǵany úshin qylmystyq jaýapkershilikke tartylǵan bolatyn. Nur-Sultan qalasynyń Polıtsııa departamenti qundy dúnıelerdi urlatyp almaý úshin nysandarǵa beınebaqylaý kameralary men kúzet dabylyn ornatý qajettigin eskertedi», - dep jazylǵan departamenttiń dereginde.