Nur-Sultanda oqýshylar «Elbasy medalimen» marapattaldy
«El Úmiti» bastamasyn iske asyrý aıasynda Tuńǵysh Prezıdent Qory men «Elbasy akademııasy» korporatıvtik qory 2020 jyldyń shilde aıynda balalar men jastarǵa arnalǵan «Elbasy medali» jańa jobasyn iske qosty. Baǵdarlamaǵa 14-29 jas aralyǵyndaǵy jas qazaqstandyqtar qatysty. Sharany Nur-Sultan qalasynyń bilim basqarmasy, «Astana daryny» daryndylyqty damytý jáne psıhologııalyq súıemeldeý ortalyǵy uıymdastyrdy.
«Jastar – el bolashaǵy. Elbasy Nursultan Nazarbaev jastarymyz ǵylymmen aınalyssa, bizdiń bolashaǵymyz zor bolmaq degen bolatyn. «Elbasy medali» – jastardy keshendi damytýǵa baǵyttalǵan ulttyq deńgeıdegi jalǵyz baǵdarlama. Búgin osy jerde otyryp, sizder maqsattaryńyzǵa jetý jolynda aıanbaıtyndyqtaryńyzdy dáleldedińizder. Sizderge zor densaýlyq pen sáttilik tileımin. Tek alǵa umtylyp, arman qýyńyzdar», - dedi Balalardy jáne jastardy damytý dıagnostıkalaý ortalyǵynyń basshysy Gúlim Júsipova.
Onyń aıtýynsha, byltyrdan bastap 11 myń bala «Elbasy medali» jobasyna qatysqan. Munda ár balaǵa jeti baǵytta tapsyrmalar beriledi: sport, talanttar men daǵdylar, kitap oqý, ulttyq mura, volonterlik, ekspedıtsııalar men joryqtar, eńbek praktıkasy. Ár qatysýshyǵa arnaıy tálimger belgilenedi. Olar tapsyrmalardy balalardyń tulǵalyq erekshelikterine saı berip otyrady. Barlyǵy respýblıka boıynsha 11 myń qatysýshyǵa 600-den asa tálimger belgilengen. Tapsyrmalardyń oryndalýy telefon arqyly qadaǵalanǵan.
«Ár adam 6 aı boıy bir baǵytta jumys jasaı berse, aqyrynda ol ádetke aınalady. Bizdiń maqsatymyz osy», - dedi Gúlim Júsipova.
«Elbasy medali» jobasynyń qola deńgeıine 14 jastap bastap qatysýǵa bolady, bul deńgeıde tapsyrmalar 6 aıǵa alynady. Kúmis deńgeıge 15 jastap bastap qatysyp, 12 aıǵa tapsyrmalar alýǵa bolady. Al altyn medal alý úshin tapsyrmalar 18 aıǵa beriledi. Bul deńgeıde qatysýshylar jasy 16-dan bastalady.
«Elbasy medali» jobasyna ótinimderdi qabyldaý kezeńiniń bastalǵanyn ǵalamtor arqyly Nazarbaev qorynyń paraqshasynan bildim. Baǵymdy synap kórýge bel baıladym. Joba aıasynda alty aıdyń ishinde berilgen tapsyrmalardy oryndap, búgin marapatqa ıe boldym», - deıdi Nur-Sultan qalasy memlekettik akademııalyq fılarmonııasynyń solısi Ábdilda Altynbek.
Qola medal ıegeri kitap oqý baǵyty boıynsha Saıyn Muratbekovtiń «Jabaıy alma», álem klassıkteri qatarynan Pýshkınniń «Evgenıı Onegınin» oqyp shyqqan.
«Daryn men daǵdy baǵyty boıynsha Ahmet Jubanov pen Latıf Hamıdıdiń «Abaı» operasyndaǵy Abaıdyń basty partııasyn, Evgenıı Býsılovskııdiń «Qyz Jibek» operasynan bas keıipker Bekejannyń partııalaryn jattadym. Bul men úshin úlken jetistik. Aldaǵy ýaqytta jobanyń kúmis deńgeıine qatysatyn oıym bar», - dep bólisti Ábdilda Altynbek.
Barlyǵy respýblıka boıynsha 3335 qatysýshy qola deńgeıindegi «Elbasy medali» ıegeri atandy.
Ulystyń uly kúni – Naýryz merekesi qarsańynda «Elbasy medali» baǵdarlamasynyń taǵy 31 jeńimpazy qola medalmen marapattalady.
