Nur-Sultanda ınternet alaıaqtarynan 1 mlrd teńge shyǵyn kelgen – polıtsııa

NUR-SULTAN. QazAqparat – Jyl basynan beri elordada 1400-ge jýyq alaıaqtyq faktisi tirkeldi. Bul týraly qalalyq polıtsııa departamentiniń Krımınaldyq polıtsııa basqarmasy bóliminiń bastyǵy Talǵat Bólegenov aıtyp berdi, dep habarlaıdy QazAqparat tilshisi.

«Sońǵy jyldary joǵary tehnologııalardyń damýyna baılanysty ınternet-alaıaqtyq faktileriniń sany aıtarlyqtaı ósken. Jyl basynan beri 5 aıda elorda aýmaǵynda 1390 ınternet-alaıaqtyq faktisi tirkeldi. Al ótken jyldyń 5 aıynda 1730 jaǵdaı tirkelgen edi. Internet-alaıaqtyqtan kelgen jalpy materıaldyq shyǵyn 1 mlrd 150 mln teńgeden asty», - dedi Talǵat Bólegenov qalalyq polıtsııa departamentinde ótken brıfıngte.

Polıtsııanyń málimetinshe, atalǵan kezeńde 48 ınternet-alaıaq ustalyp, qylmystyq jaýapkershilikke tartylǵan.

«Jábirlenýshilerge shamamen 135 mln teńge shyǵyn óteldi. Ustalǵan 48 adamnyń 25-i eki jáne odan da kóp epızod jasaǵan. Kúdiktiler – negizinen 20-35 jas aralyǵyndaǵy adamdar», - dedi bólim bastyǵy.

Mysaly, olardyń biri ınternet jelisinde 60-tan astam alaıaqtyq jasaǵan.

«Bıyl kámeletke tolmaǵan bir adam ınternet-alaıaqtyq jasaǵany úshin jaýapqa tartyldy. Ol shamamen 25 adamdy aldaǵan jáne jedel-tergeý is-sharalary barysynda ustaldy. Onyń ózi basqa qalada bolsa da, elordadaǵy páterlerdi jalǵa berý týraly habarlandyrýlar jarııalap otyrǵan. Saldarynan kúdikti ózgelerge 350 myń teńge shyǵyn keltirgen», - dedi T. Bólegenov.