Nur-Sultanda esirtki saýdasyn otbasylyq kásipke aınaldyrǵan erli-zaıypty ustaldy

NUR-SULTAN. QazAqparat – Elorda aýmaǵynda «Qarasora» respýblıkalyq jedel aldyn alý is-sharasy aıasynda asa iri kólemde esirtki jetkizýmen jáne ótkizýmen aınalysatyndardy ustaý boıynsha arnaıy operatsııa júrgizildi, dep habarlaıdy QazAqparat Nur-Sultan qalalyq PD baspasóz qyzmetine silteme jasap.

«Petrov kóshesinde elordanyń 50 jastaǵy turǵyny ustaldy. Áıel adamnyń jeke zattaryn tintý barysynda sómkesinen salmaǵy 400 gramm bolatyn satýǵa daıyndalǵan gashısh jáne marıhýana tabyldy. Odan ári páterdi tintý barysynda onyń 47 jastaǵy kúıeýi ustaldy. Ol óz erkimen balkonda saqtalǵan 10 kg jýyq gashısh jáne 1,5 kg jýyq marıhýanany berdi», - delingen baspasóz málimdemesinde.

Sonymen qatar, Botaly kóshesiniń boıynda otbasylyq juptyń sybaılasy bolǵan 25 jastaǵy er adam ustalǵan.

«Ony jeke jáne avtokóligin tintý barysynda marıhýana tárkilendi. Tárkilengen esirtkiniń jalpy salmaǵy 11 kılogramnan astam», - dep kórsetilgen habarlamada.

Atalǵan fakti boıynsha QR QK 297-baby 3-bóligi «esirtki zattardy, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, satyp alý, saqtaý, tasymaldaý, jóneltý nemese ótkizý» boıynsha sotqa deıingi tergeý júrip jatyr. Aıyptylar 12 jylǵa deıin bas bostandyǵynan aıyrylýy múmkin.

Polıtsııa esirtki jetkizý arnasyn, sondaı-aq onyń zańsyz aınalymyna qatysy bar adamdardy anyqtaýǵa kiristi.

Nur-Sultan qalasy PD EQQІB bastyǵy, polıtsııa polkovnıgi Erlan Aqbarovtyń aıtýynsha, jyl basynan beri zańsyz aınalymnan 130 keliden astam túrli esirtki zattary tárkilengen.