Nur-Sultanda Ázerbaıjan saýda úıi ashyldy
Búgin baýyrlas Ázerbaıjan men Qazaqstan Respýblıkalarynyń ekonomıkalyq baılanysy nyǵaıtýǵa jol ashatyn erekshe shara ótti. Eki el Prezıdentteriniń tapsyrmasy boıynsha Bakýde Qazaqstan saýda úıi ashylsa, Nur-Sultanda Ázerbaıjan saýda úıi ashyldy.
Saýda úıiniń ashylýyna kelgen qonaqtarǵa Ázerbaıjan Respblıkasynyń Qazaqstandaǵy Tótenshe jáne Ókiletti elshisi Rashad Mammadov lebiz bildirdi
«Búgingi sharany merekelik shara dep aıtýǵa bolady. Ázerbaıjannyń táýelsizdik kúni qarsańynda Qazaqstan astanasynda osyndaı erekshe sharaǵa kýá bolyp otyrsyzdar. 28 mamyrda Ázerbaıjan 103 jyldyǵyn atap ótedi. Osyndaı merekelik oqıǵalardyń aldynda Ázerbaıjan saýda úıin ashyp otyrmyz. Mundaı nysandy ashýǵa eki el Prezıdentteri bastamashy bolǵanyn aıtý kerek. Bul – Ázerbaıjannyń Qazaqstandaǵy alǵashqy ári jalǵyz saýda úıi. Aldaǵy aılarda bul ortalyqtyń Aqtaý jáne Almaty qalalarynda fılıaldary ashylady. Keleshekte Qazaqstannyń búkil aýmaǵynda osyndaı bólimsheler ashylady dep úmittenemiz», - dedi dıplomat.
Onyń aıtýynsha, saýda nysany Ázerbaıjannan Qazaqstanǵa eksporttaýǵa bolatyn ónim shyǵaratyn orta jáne shaǵyn kásiproryndar úshin jaqsy múmkindik bolmaq. Al qazaqstandyq tutynýshylar Ázerbaıjannyń dámdi azyq-túligi men ónerkásip ónimderine tikeleı qol jetkize alady.
«Koronavırýs pandemııasy barlyq elderdiń josparyn ózgertip, aradaǵy saýda baılanysyna keri áser etkenine qaramastan, Qazaqstan men Ázerbaıjan pandemııaǵa deıingi baılanystardy damyta túsýge qajetti qadamdardy jasap otyr. Qazirdiń ózinde eki el arasynda ishki jáne tranzıt júk aınalymynyń kólemi artyp otyr. Elderimizdiń ınfraqurylymǵa salǵan mıllıardtaǵan ınvestıtsııalary ekonomıkanyń belsendi damýyna múmkindik ashyp, búkil óńirdiń damýyna jaqsy áleýet ashyp otyr», - dedi Rashad Mammadov.
Qazaqstan tarapynan sóz alǵan Energetıka vıtse-mınıstri Áset Maǵaýov Qazaqstan men Ázerbaıjan arasyndaǵy baılanys saýda-ekonomıkalyq, kólik-logıstıka, energetıka, mádenı-gýmanıtarlyq jáne basqa da salalarday qamtıtynyn eske saldy.
«Birneshe jyl buryn Baký-Tbılısı-Kars halyqaralyq temirjol jelisiniń ashylýyna kýá boldyq. Ol sózsiz Jibek joly boıyndaǵy elder úshin ekonomıkalyq yntymaqqa jańa serpin berdi. Sondaı-aq, kezekti otyrysy bıyl Nur-Sultan qalasynda ótýi josparlanyp otyrǵan Qazaqstan-Ázerbaıjan saýda-ekonomıkalyq yntymaqtastyq komıssııasynyń jumysy ekijaqty qatynastardy damytýǵa yqpal etedi. Memleket basshylary aradaǵy taýar aınalymyn eki ese arttyrýǵa mindet qoıdy. Bul minde eki aradaǵy baılanystyń baýyrlastyq rýhyna sáıkes keledi», - dedi vıtse-mınıstr.
Byltyr Qazaqstan men Ázerbaıjan arasyndaǵy saýda aınalymy 170 mln dollar bolǵan. Saýda jáne ıntegratsııa vıtse-mınıstri Qaırat Tórebaevtyń aıtýynsha, bul olqylyqty ornyn toltyrýǵa kóptegen múmkindik bar.
«Bul saýda úıi eki el arasyndaǵy saýda aınalymyn arttyrýǵa arnalǵan. Ázerbaıjan men Qazaqstan tek baýyrlas elder ǵana emes, strategııalyq seriktester. Aradaǵy qarym-qatynas 100 jyldan beri jalǵasyp keledi. Táýelsizdik alǵan kúnnen bastap ekonomıkalyq baılanysty nyǵaıtyp kelemiz. Byltyr pandemııalyq shekteýlerge baılanysty aradaǵy saýda aınalymynyń dollarǵa shaqqandaǵy 30 paıyzǵa túsip ketti. Alaıda kólemi sol kúıinde saqtalyp otyr. Onyń aldyńǵy jyldary aradaǵy saýda aınalymynyń kólemi 200 mln dollar bolatyn. Sol qarqyndy qalpyna keltirip, ári qaraı ósirý úshin osyndaı saýda úıi ashylyp otyr. Buǵan deıin aradaǵy ekonomıkalyq qatynas energetıkalyq kelisimder aıasynda júretin. Al budan bylaı saýda men ıntegratsııalyq protsesterge basymdyq beriledi. Ázerbaıjan men Túrkııanyń arasy temirjol arqyly jalǵanatynyn eskersek, Ázerbaıjanǵa úlken úmit artýǵa bolady», - deıdi Qaırat Tórebaev.
Elordada ashylǵan saýda úıi úlken kólemde taýar tasymaldaıtyn kásipkerlerge de, qarapaıym turǵyndarǵa qyzmet kórsetetin bolady. Turǵyndar ózine qajetti ázerbaıjandyq ónimderdi satyp alsa, ımporttaýshylar ár ónimniń sapasyn tekserigennen keıin osy nysan arqyly úlken kólemde kelisimdar jasaı alady.
