Nur-Sultanda «Abyz Ábish» kitaby tanystyryldy
Ábish Kekilbaıuly týraly tolǵanystardy QR Parlamenti Májilisiniń depýtaty, fılologııa ǵylymdarynyń doktory, professor Saýytbek Ábdirahmanov jazǵan. Onda qalamgerdiń álemdik aýqymdaǵy asqan oıshyldyǵy, mádenıet, óner, saıasat, tarıh, ádebıettegi sheberligi jan-jaqty kórsetilgen.
«Qaı halyqta da maqtan tutatyn tulǵalar bolady. Ulttyń óz ishinde ardaq tutatyn adamdar az emes. Biraq, halyqtyń ózge dúnıege, álemge mańdaı etip ustaıtyn tulǵalary kóp bolmaıdy. Olar az bolady. Sol qazaq úshin azdyń bireýi – Ábish. Qazirdiń ózinde áýlıe Ábish, ańyz Ábish dep atalyp otyrǵan, kózi tirisinde-aq ańyzǵa aınalǵan adam shyn máninde álemdik barlyq ólshemder boıynsha uly oıshyldar qatarynda. Jasy otyzdan jańa asqan kezde-aq Eýropanyń baspalary HH ǵasyrdaǵy álemniń 100 tańdaýly jazýshysy qataryna qosqan tulǵa bolatyn. Ábish aǵanyń sheshendigi, kósemdigi, ádildigi, taýsylmaıtyn bilimi, erekshe jady bolashaq urpaqqa tańǵalarlyq fenomen, úırenetin úzdik úlgi bolyp qala beredi», - dedi Saýytbek Abdrahmanov.
Kitaptyń alǵysózin Qazaqstan Respýblıkasynyń Prezıdenti Qasym-Jomart Toqaev jazǵan.
Aıta keteıik, Ábish Kekilbaıulynyń 80 jyldyq mereıtoıy keń aýqymda atalyp ótýde. Almatyda jazýshy atyna kóshe berilip, ózi turǵan úıge memorıaldyq taqta qoıyldy. Týǵan aýylyndaǵy mektepte mýzeı ashylyp, jazýshynyń bıýsti ornatyldy. Mańǵystaý oblystyq ólketaný mýzeıine Ábish Kekilbaıulynyń aty berildi.
Nur-Sultanda ótken «Ábish Kekilbaıuly jáne Uly dala rýhanııaty» atty halyqaralyq ǵylymı-teorııalyq konferentsııada jazýshy shyǵarmalaryn BUU tilderine aýdaryp, keńinen nasıhattaý úshin Ulttyq aýdarma bıýrosyna usynys jasaý, EUÝ-degi «Ábish Kekibaıuly dárishanasyn» tyń materıaldarmen tolyqtyryp, qaıta jabdyqtaý jáne Á. Kekilbaıulynyń qaıratkerligine baılanysty qujattardy kóp tomdyq jınaq etip daıarlaý jóninde qarar qabyldandy.
