Nur-Sultan Ortalyq Azııada birinshi bolyp Garvard konferentsııasyn ótkizedi
Garvard ýnıversıtetiniń óner jáne ǵylym mektebi men Nazarbaev Ýnıversıtetiniń stýdentteri birlesip uıymdastyratyn konferentsııa búkil Azııa-Tynyq muhıty aımaǵyndaǵy halyqaralyq máselelerdi qozǵaıdy.
Nazarbaev Ýnıversıtetinde bolatyn aldaǵy konferentsııanyń negizgi taqyryby – «Ózgeristerge umtylys». Osy is-shara aıasynda 6 túrli baǵyttaǵy semınar men plenarlyq sessııa ótedi. Atap aıtqanda, ǵalamdyq jáne ekonomıka, kórkemóner, buqaralyq aqparat quraldary men mádenıet, áleýmettik saıasat jáne ádilet, energetıka jáne ekologııalyq turaqtylyq, basqarý jáne geosaıasat, ǵylymı tehnologııalar taqyryby qaýzalady.
Dese de, konferentsııanyń negizgi taqyryby – tsıfrlandyrý nemese tsıfrlyq túrlendirýge baılanysty bolmaq. Tsıfrlandyrýdyń sońǵy tendentsııasy derekter men tehnologııalar álemi úshin jańa taraýdy bastaǵany málim. Memlekettik jáne jeke deńgeıde júzege asyrylatyn strategııalar kóbinese derekterden bastaý alady.
«Osy konferentsııanyń maqsaty – transformatsııa, sanamyzdy ózgertý jáne dástúrli ádisterden alystaý, sonymen qatar, jańa sandyq tehnologııalardy qoldana otyryp damýdyń jańa deńgeıine kóshý»,- deıdi uıymdastyrýshylar.
«Alǵashynda HPAIR Asia 2019 konferentsııasyn Qazaqstanda ótkizý maqsatynda byltyr 5 adamnan turatyn kishigirim top qurylǵan bolatyn. Biraq, qazirgi tańda ol top tolyqtyrylyp, búginde uıymdastyrýshy komıtettiń quramyna Nazarbaev Ýnıversıtetiniń 28 stýdenti endi. Bul jobany iske asyrý barysynda óte aýqymdy jumys júrgizildi. Alǵashqy jarty jylda tobymyz halyqaralyq konferentsııany elordaǵa alyp kelý úshin ótinish ótkizdik. Qazaqstannan basqa Sıngapýr, Japonııa, Qytaı, Taıvan elderi sekildi birneshe memleket ótinish bildirgen bolatyn. Alaıda sheshýshi kezeńge Qazaqstan men Qytaı ótti. Aqyry, osy jyldyń aqpan aıynda Qazaqstannyń jeńiske jetkeni belgili boldy», - dedi HPAIR Asia 2019 konferentsııasynyń atqarýshy dırektorynyń orynbasary Yrymgúl Ybraıymova Nazarbaev Ýnıversıtetinde ótken baspasóz máslıhatynda.
Konferentsııaǵa halyqaralyq kompanııalardyń basshylary, belgili yqpaldy adamdar, túrli saladaǵy qoǵam qaıratkerleri kelgeli otyr. Olardyń qatarynda UNICEF Koreıa prezıdenti, doktor Song San Hen, Úndistannyń eks-syrtqy ister mınıstri Nırýpama Rao, Taıaý Shyǵystaǵy jáne Soltústik Afrıkadaǵy ǵalamdyq naryqtar boıynsha Standard Chartered Bank-tiń eks-basshysy Denıel Atstsı, Nobel syılyǵynyń laýreaty Rae Kvon Chýng, McKinsey & Company kompanııasynyń aǵa seriktesi jáne McKinsey Dúnıejúzilik ınstıtýtynyń dırektory Djonatan Vottsel, World Bank Group-tyń bas tehnıkalyq dırektory Leslı Go, Ońtústik-Shyǵys Azııadaǵy Sıngapýrdan shyqqan Bain & Company seriktesi Tıll Vesterıng, Halyqaralyq valıýta qorynyń Azııa-Tynyq muhıty aımaqtyq keńsesiniń dırektory Chıkahasa Sýmı, Indonezııa ınfraqurlym ınstıtýtynyń tóraǵasy jáne Indonezııanyń eks-qarjy mınıstri Chatıb Basrı, Vashıngtondaǵy CNN, Nıý-Iorktegi ABC News, Stanbuldaǵy News News Asia, Berlındegi Deutsche Welle TV bar. Al Qazaqstan tarapynan burynǵy Bilim jáne ǵylym mınıstri Erlan Saǵadıev, QR Syrtqy ister mınıstriniń orynbasary Erjan Ashyqbaev, Halyqaralyq qatynastar jónindegi qazaqstandyq keńestiń dırekory Eskendir Aqylbaev, Nur-Sultan qalasynyń ákimi Altaı Kólginov jáne t.b tulǵalar sóz sóıleıdi.
Uıymdastyrýshylardyń aıtýynsha, konferentsııanyń ótkizilýine «Kaztsınk» JShS, ERG, Chevron jáne Microsoft kompanııalary qoldaý bildirip otyr. Konferentsııa stýdenttik sıpatta bolǵannan keıin tanymal spıkerlerdiń bári tegin keletin kórinedi.
