«Nur Otan» partııasynyń Túrkistan oblystyq fılıaly «Open space» formatyna kóshedi
Partııanyń jeti baǵyty boıynsha jumys júrgizýdi tapsyrǵan óńir basshysy «Nur Otan» partııasynyń halyqqa jaqyn bolýy úshin barynsha ashyq formatqa kóshýdi tapsyrdy.
«Partııa ashyq bolýy tıis. Onyń ǵımaratyna ár adam erkin kirýi tıis. Osy oraıda oblystaǵy jobalyq keńsemen birge «Nur Otan» partııasy oblystyq fılıaly «Open space» formatymen jumys isteýi tıis. Ol úshin basqa ǵımaratqa kóshedi. Men ózim osy ashyq alańǵa kelip, partııamen birge halyqpen jıi kezdesetin bolamyn», - dedi Ómirzaq Shókeev.
Jıynda baıandama jasaǵan partııa fılıaly tóraǵasynyń birinshi orynbasary Beısen Tájibaev oblystaǵy birqatar máselelerge toqtaldy. Onyń aıtýynsha, demografııalyq ósimi eń joǵary Túrkistan oblysynda 2 mıllıonǵa jýyq turǵynnyń 464 033 myńy – oqýshy balalar. Osy balalardyń jan-jaqty damýyna, quqyǵynyń qorǵalýyna jaýaptylyqty kúsheıtý kerek. Alaıda bilim berý uıymdarynda ótkizilip jatqan aýqymdy sharalarǵa qaramastan, jasóspirimder arasyndaǵy qylmys pen quqyqbuzýshylyq deńgeıi tómendemeýde.
«Búgingi bala – erteńgi qoǵam múshesi, memleketti qalyptastyratyn tulǵa» dep qarasaq, balalardyń quqyǵyn saqtaýdy barlyǵymyz osyndaı alqa otyrystarynda ashyq talqylap iske asyrsaq, bolashaq urpaqtyń zorlyq-zombylyqqa ushyramasy anyq. Osy maqsatta otbasy ınstıtýtyn qoldaýǵa baǵyttalǵan «Baqytty otbasy» jobasy aıasynda partııanyń oblystyq, aýdandyq, qalalyq fılıaldary janynan «Balalardyń quqyqtary men zańdy múddelerin qamtamasyz etý jónindegi monıtorıng júrgizý jáne qoǵamdyq baqylaý toptary» qurylyp, birshama jumystar atqaryldy jáne oblys boıynsha ómirlik qıyn jaǵdaıdaǵy kópbalaly otbasylarǵa monıtorıng júrgizilýde», - dedi Beısen Tájibaev.
Partııa músheleri bas qosqan jıynda jumyssyzdyq máselesi de sóz boldy. Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasy sheńberinde 2019 jyly 71 828 adamdy jumyspen qamtý sharalaryna qatystyrý josparlanyp, naqty 43 296 adam jumyspen qamtý sharalaryna qatysqan, bul halyqtyń nebári 60,2%-yn qurap otyr. Sondaı-aq Shardara, Keles, Jetisaı, Maqtaaral, Saryaǵash aýdandarynda aýyldyń ishki joldary men respýblıkalyq mańyzy bar trassalardyń sapasy syn kótermeıdi. Atalǵan 5 aýdannyń halyq sany 700 myńǵa jýyqtasa, olardyń ómiri tikeleı jolmen tyǵyz baılanysty. Statıstıkaǵa súıensek, jol nasharlyǵynan 2019 jyldyń alǵashqy 7 aıynda 117 jol-kólik oqıǵasynda 16 adam kóz jumǵan. Bul degenimiz «Nur Otan» partııasynyń elimizdegi ınjenerlik-áleýmettik ınfraqurylymdy damytýǵa baǵyttalǵan «Qutty meken» ulttyq jobasynyń óz dárejesinde iske aspaı otyrǵandyǵyn ańǵartady.
«Shekaralas aýmaqtaǵy strategııalyq mańyzy bar osy aýdandardaǵy joldardyń sapasyn jaqsartatyn kez jetti. Bul – el tilegi. Sondyqtan atalǵan aýdandardyń joldaryn jańartýdy jáne osy baǵyttaǵy jumysty jandandyrý úshin partııanyń XVIII Sezinde qabyldaǵan «Qutty meken» ulttyq jobasy aıasynda partııalyq baqylaýdy kúsheıtýdi usynamyz», - dedi partııa fılıaly tóraǵasynyń birinshi orynbasary.
Sonymen qatar, qazirgi tańda áleýmettiń ózekti taqyrybyna aınalǵan ataýly áleýmettik kómekti alýdaǵy zańsyzdyqtar da sóz boldy. «E-Halyq» aqparattyq júıesiniń derekterine sáıkes, 1000-ǵa jýyq otbasy tabysy tómen jáne muqtaj otbasylarǵa ǵana beriletin ataýly áleýmettik kómekti zańsyz alý úshin ózderiniń naqty tabysyn jasyrǵan. Osyǵan baılanysty ruqsatsyz tólengen tólemderdi qaıtarý jáne qaıta qaraý, zańbuzýshylyqtardyń aldynalý boıynsha árbir anyqtalǵan faktige sáıkes jeke-jeke jumys júrgizilýde», - dedi Beısen Tájibaev.
Jıyn qorytyndysynda partııa fılıaly azamattardan kelip-túsken aryz-ótinishterdi der kezinde qarap, olardy zań aıasynda ońtaıly sheshý maqsatynda apta saıyn taqyryptyq qoǵamdyq qabyldaýlar ótkizýdi kelisti. Oblystyq partııa fılıalynyń ǵımaratyndaǵy qabyldaýlarǵa memlekettik organ basshylarynyń qatysyp, áleýmettik jelilerde, tikeleı efırde kórsetiletin boldy.
