«Nur Otan» kásipkerlikti qoldaıtyn baǵdarlama ázirlep jatyr» - respýblıkalyq basylymdarǵa sholý
***
«Egemen Qazaqstan» basylymy búgingi sanynda «Jańa oqý jylyna daıyndyq qalaı?» atty maqala jarııalady. Maqalaǵa keshe Premer-Mınıstr Kárim Másimovtiń tóraǵalyǵymen ótken selektorlyq májiliste kóterilgen máseleler arqaý bolǵan. Basylymnyń jazýynsha, 2011 jyly respýblıkalyq bıýdjet esebinen elimizde jalpy quny 49,6 mıllıard teńge bolatyn 142 bilim berý nysandaryn salý josparlanǵan. Onyń ishinde 41,9 myń oqýshyǵa arnalǵan 70 mektep, 17,7 myń oryndyq 70 balabaqsha, 1200 oqýshyǵa arnalǵan 2 kásibı-tehnıkalyq lıtseı paıdalanýǵa berilmek. Bıylǵy jańa oqý jyly qarsańynda 9 jańa mektep ashyldy. Óńirlerde jańa oqý jylyna deıin 678 mektep kúrdeli jóndeýden ótkizilýge tıis bolatyn. 15 tamyzǵa deıingi málimet boıynsha, bul bilim nysandarynyń 80 paıyzy jóndeýden ótken. Alaıda elimizdiń tótenshe jaǵdaılar salasynyń ókilderi bul salada áli de bolsa birqatar problemalardyń bar ekendigin aıtyp otyr.
Sondaı-aq atalmysh basylymnyń búgingi sanynda «Otan ıgiligine ortaq úles» atty maqala basyldy. Basylymnyń jazýynsha, Mańǵystaý oblysynda arnaıy saparmen bolǵan Parlament Senatynyń Tóraǵasy Qaırat Mámı aımaqtaǵy óreli isterdi oń baǵalap otyr. Onyń sózinshe, elimizdiń barlyq aımaqtarynyń ortaq kúsh-jigeri men tabystarynyń nátıjesinde Qazaqstan mol jetistikterge qol jetkizgeni daýsyz. Olardyń ishinde Mańǵystaý oblysynyń alatyn orny erekshe ekeni de shyndyq. «Osyny aıtqan Senat Tóraǵasy qazaq halqynyń rýhanı tamyrlary men osy zamanǵy údemeli damýynyń qyzý qarqyny naq osy jerde toǵysyp jatty, dep bir qaıyrdy. Myńdaǵan tarıhı eskertkishter, ultymyz ulyqtaǵan Beket ata meshiti, Shaqpaq ata, basqa da áýlıeler jatqan jerler Kaspıı aımaǵyndaǵy barlyq elderdiń musylmandary kıe tutqan orynǵa aınaldy. Sonymen birge, Mańǵystaý - aldyńǵy qatardaǵy ınnovatsııalyq aımaq, munaı óndirý jónindegi jetekshi ólkelerdiń biri, bizdiń teńizdegi basty qaqpamyz», - dep atap kórsetken. Sonymen qatar ol sózinde aımaqtaǵy birqatar problemalarǵa da toqtalady. Bul týraly «Egemen Qazaqstan» basylymynyń búgingi sanynda.
***
«Aıqyn» basylymynyń jazýynsha, «Nur Otan» kásipkerlikti qoldaıtyn baǵdarlama ázirlep jatyr». Osyndaı taqyryppen jarııalanǵan maqalada «Nur Otan» partııasynyń múldem jańa baǵdarlama ázirlep jatqandyǵy aıtylady. «Bul qujatta júıe quraýshy kásiporyndar men shaǵyn kásipkerliktiń ózara áriptestigine jaǵdaı jasaý máselesine basty nazar aýdarylatyn bolady. Sarapshylardyń pikirinshe, jergilikti mazmundy 100 mlrd teńgege kóbeıtse, sonyń nátıjesinde shaǵyn jáne orta bıznes salasynda qosymsha 50 myń jańa jumys ornyn qurýǵa múmkindik beriledi. Bul, ásirese, júıe quraýshy kásiporyndar basty jumys berýshiler bolyp tabylatyn shaǵyn qalalar úshin asa mańyzdy»,-delingen maqalada.
Bul týraly «Aıqyn» basylymynyń búgingi sanynda.
Sondaı-aq atalmysh basylym Reseıdiń mıgratsııa qyzmeti elge syrttan kelgen azamattardyń orys tilin qanshalyqty deńgeıde meńgergendigin tekserýdi usynyp otyr. «Osylaısha 100 paıyz oryssha sóıleıtin kórshilerimiz «kúsheıip» jatqanda elimizde memlekettik tilde 100 paıyz sóıleı almaı turǵanymyz ókinishti jaǵdaı. Kúni keshe keıbir basylymdar «Memlekettik til týraly zańǵa ózgerister engiziledi» dep shýlap qoıa berip edi, ómirge kelmegen zańnyń ózine qaıta ózgerister engizip tastadyq. Sonda qalaı? Jıyrma jylda jıyrma sóz jattaı almaǵandarǵa Qazaqstan bıligi qashanǵy jeńildik jasaı beredi? Bul jerde eń basty máseleni týǵan tiline tiksine qaraıtyn óz ultymyzdyń ulandarynan bastaǵanymyz jón bolar»,-dep jazady basylym. Maqalany tolyq oqyp shyqqyńyz kelse, «Aıqyn» basylymynyń búgingi sanyn jiberip almańyz.
***
«Alash aınasy» basylymy búgingi sanynda «Qazaqqa qorǵasyn qymbat pa, densaýlyq qymbat pa?» degen maqala jarııalady. Basylymnyń jazýynsha, 1934 jyly salynǵan Shymkent qorǵasyn zaýyty búginde qalanyń ortasynda qalyp qoıǵan. Kásiporynyń jalpy aýmaǵy 116 gektardy quraıdy. Aýa men aınalaǵa tastalǵan qorǵasyn qaldyqtarynyń saldarynan topyraq pen aýanyń ýlaný deńgeıi normatıvtik shekten birneshe júz esege artyp ketken. Bul týraly «Alash aınasy» basylymynyń búgingi sanynan tolyǵyraq bilýge bolady.
Sondaı-aq atalmysh basylym «Oqý quny Oksfordqa taıap qaldy»,-dep jazady. Basylymnyń habarlaýynsha, osydan jeti jyl buryn JOO-daǵy oqý baǵasy 120 myń teńge bolsa, búginde Bilim jáne ǵylym mınıstrliginiń nusqaýymen kúndizgi bólimdegi aqyly bilimniń eń tómengi somasy 341 myń teńgege belgilendi. Ármen qaraı qandaı baǵa qoısa da, JOO-nyń óz quzyrynda. Onyń mamandyqqa baılanysty bolatyny
da belgili. Máselen, QazUÝ-da zańgerdiń oqýy 600 myń teńgeden asyp jyǵylady. Degenmen oqý baǵasy qymbattady dep eken dep, tizgindi tartatyn talapker de, ata-ana da kórinbeıdi. Bul másele jóninde «Alash aınasy» basylymynyń búgingi sanyna tolyq bilýge bolady.
***
«Kazahstanskaıa pravda» basylymynyń búgingi sanynda «Jýrnalıstıka sostoıt ız talanta, masterstva ı mýjestva» atty maqala basty. Maqalaǵa el Táýelsizdiginiń 20 jyldyǵyna Almatyda «Qalamger-Azamat» degen atpen ashylǵan jas jýrnalısterdiń IV forýmynda kóterilgen máseleler negiz bolǵan. Elimizde ár jyl saıyn dástúrli túrde uıymdastyrylyp kele jatqan jıynǵa bıyl Túrkııa, Qyrǵyzstan, Qytaı memleketteriniń de ókilderi qatysýda.
Al onda kóterilgen máseleler týraly tolyq bilgińiz kelse, «Kazahstanskaıa pravda» basylymynyń búgingi sanyn qarańyz.
