Norvegııada balalardy urlaýǵa qarsy sharalar kúsheıtildi

ASTANA. KAZINFORM — Norvegııada 100-ge jýyq kámeletke tolmaǵan balaǵa halyqaralyq izdeý jarııalanǵan. Olardyń denin shetelge zańdy ókili nemese ata-anasynyń biri zańsyz shyǵarǵan, dep habarlaıdy AZERTADJ.

Polıtsııa mundaı jaǵdaıdyń kóbeıgenine baılanysty qaýipti toptaǵy balalardy resmı túrde joǵalyp ketkenge deıin tirkeýge jáne olarǵa saıahattaýǵa tyıym salýǵa múmkindik beretin jańa profılaktıkalyq qural aldy.

Bılik ókilderiniń aıtýynsha, sońǵy bir jylda shetelde qalýǵa májbúrleý jaǵdaıy aıtarlyqtaı kóbeıgen. Elde úsh jyl ishinde 72 bala iz-tússiz joǵalǵan. Balalardy qorǵaý organdary balanyń ata-anasymen bir úıde turýy qaýipsiz emes dep sanaıdy.

Jańa profılaktıkalyq shara teris áleýmettik baqylaý men «ar-namysqa» negizdelgen zorlyq-zombylyqpen kúresý jónindegi úkimettik strategııanyń bóligi.

Máselege ázil-ysqaqshy Muhammed Basefer erekshe nazar aýdardy, ol 15 jasynda Iemende qalaı qalyp qoıǵanyn jáne ákesiniń tólqujatymen Norvegııaǵa oralǵanyn aıtyp berdi. Ol mektep muǵalimi kómekteskenge deıin birneshe aı kóshede qalýǵa májbúr bolǵan. Bılik mundaı oqıǵalar máselege erte aralasý men aldyn alýdyń mańyzdylyǵyn kórsetetinin jetkizdi. Bul balalardy májbúrli nekege turýdan, oqshaýlanýdan jáne sheteldegi qaýipti ómir súrý jaǵdaılarynan qutqara alady.

Aıta keteıik, elimizde áıel quqyǵy men bala qaýipsizdigin qamtamasyz etetin zańnyń kúshine engenine bir jyl boldy. Bul zań balalardyń qaýipsizdigin qamtamasyz etýge baǵyttalǵan naqty sharalardy engizýge jol ashty.