Nobel fest – Álem ǵalymdary Astanada medıtsına máselelerin talqylap jatyr
ASTANA. KAZINFORM – Astanada medıtsınalyq ınnovatsııalar taqyrybyna arnalǵan Nobel fest halyqaralyq festıvali ashyldy. Forým medıtsınadaǵy jańa trendter, uzaq ómir súrýdegi jetistikter, qaýipsizdik taqyrybyn talqylaý úshin álemniń úzdik sarapshylaryn jınady.
Nobel fest negizin qalaýshy jáne dırektory Maqsat Qurbenov is-sharanyń qazaqstandyq qoǵamdastyq úshin mańyzdy ekenin atap ótti.
«Búgin medıtsına máselelerine arnalǵan alǵashqy Nobel fest ótip jatyr. Bul aýqymdy taqyryp, biz tutas aımaqta osy taqyryp boıynsha alǵashqy aýqymdy konferentsııa qurǵymyz keldi. Festıval baǵdarlamasyna Amerıkadan, Frantsııadan jáne TMD elderinen 40-tan astam halyqaralyq sarapshy men álemdik bedeldi marapat ıegerleri qatysady. Festıvaldiń mıssııasy – álemdik bilimdi qoljetimdi etý jáne álemdik ǵalymdardyń Qazaqstanǵa medıtsınadaǵy bilimimen jáne jańalyqtarymen bólisý úshin kelýi», - dedi Maqsat Qurbenov.
Dúnıejúzilik densaýlyq saqtaý uıymynyń bas dırektory Tedros Adanom Gebreıesýs beınequttyqtaý joldap, festıval uıymdastyrýshylary men qatysýshylaryna medıtsınalyq bilim ınklıýzııasy men COVID pandemııasy sabaqtaryn engizý qajettigin aıtty.
«Innovatsııalar árdaıym densaýlyq saqtaý salasyndaǵy progrestiń qozǵaltqyshy boldy. Vaktsınalar, penıtsıllın jáne adam genin zertteýge, taldaýǵa jáne tipti ózgertýge múmkindik beretin tehnologııalardy eske túsireıik. Innovatsııalar – bizdiń kózqarasymyz ben mıssııamyzdyń mańyzdy bólshegi. COVID-19 pandemııasy rekordty ýaqytta vaktsınalar ázirleý arqyly ınnovatsııanyń talaı ómirdi qutqaratynyn eske saldy. Degenmen bul ınnovatsııa ádildikpen birge júrýi kerek ekenin de kórsetedi. Vaktsına alýdaǵy teńsizdik adamdardyń ólimine jáne pandemııanyń uzaqqa sozylýyna ákeldi. Sondyqtan vaktsınalar men basqa quraldarǵa teń qoljetimdilik pandemııa týraly kelisimniń negizgi prıntsıpteriniń biri bolyp sanalady. DDSU eń shalǵaı jáne az qamtylǵan qaýymdastyqtardyń densaýlyǵyn jaqsartýǵa kómektesetin ınnovatsııalardy keńeıtý úshin jumys isteıdi. Bizdiń uıym 86 jyl buryn densaýlyq tek ony satyp ala alatyndarǵa ǵana emes, ár adamnyń negizgi quqyǵy degen senimge negizdelgen», – dedi DDSU basshysy.
Festıvaldiń ashylýynda Djordj Vashıngton ýnıversıtetiniń klınıkalyq neırohırýrgııa professory jáne Abdýlraýf neırohırýrgııa ınstıtýtynyń bas neırohırýrgy Salım Abdýlraýf óz baǵytyndaǵy mamandardyń maqsattaryn aıtty.
«HHІ ǵasyr – aqyl-oı ǵasyry. Biz neırohırýrgter aldymyzda turǵan barlyq syn-qaterdiń aldyńǵy qataryndamyz. Biz óz jumysymyzda ortasha emes, erekshe bolǵymyz keledi. Óıtkeni ómir men ólim máselelerine tap bolǵanda adamdardyń ómirin saqtap qalý úshin óz múmkindikterimizdi barynsha qoldanýymyz kerek», - deıdi Salım Abdýlraýf.
Aıta keteıik, Astanadaǵy Nobel fest 27 jáne 28 sáýir kúnderi ótedi. Іs-shara baǵdarlamasy mıdyń beımálim jumbaqtarynan bastap, jańa dáýir dertteri men uzaq ómir súrýdegi ashylýlarǵa deıin taqyryptardyń keń aýqymyn qamtıdy.
Festıval qatysýshylary Nobel syılyǵynyń laýreattarynan jeke sertıfıkattar alady.
