Nıkýshor Dan Rýmynııa prezıdenti saılaýynda jeńiske jetti

ASTANA. KAZINFORM — Rýmynııada ótken prezıdent saılaýynyń ekinshi kezeńinde el astanasy Býharesttiń qazirgi meri, eýropashyl táýelsiz kandıdat Nıkýshor Dan jeńiske jetti, dep habarlaıdy TASS.

Ol 54,17% daýys jınady, al onyń qarsylasy — ultshyl baǵyttaǵy "Rýmyndardy biriktirý alıansy" partııasynyń jetekshisi Djordje Sımıon 45,83% daýysqa ıe boldy. Bul málimetter bıýlletenderdiń 98,56%-y eseptelgennen keıin Rýmynııanyń Turaqty saılaý ákimshiligi saıtyna jarııalanǵan.

Rýmynııalyq buqaralyq aqparat quraldary Nıkýshor Dandy saılaýdaǵy jeńimpaz dep jarııalady, óıtkeni áli eseptelmegen 850 myń daýys qalǵanymen, kandıdattar arasyndaǵy aıyrmashylyq 898 myń daýysty qurap otyr.

Dannyń saılaý shtaby mańynda birneshe myńdaǵan jaqtasy jınalyp, «Nıkýshor!», «Eýropa!», «Rýmynııa!» dep urandap jatyr. Býharesttiń Elızabet býlvarynda kólik qozǵalysy ýaqytsha toqtatylǵan — bolashaq prezıdent halyqqa úndeý jasaıdy dep kútiledi.

Bul saılaý qaıta ótkizilgen prezıdenttik saılaý boldy. Josparlanǵan negizgi saılaý 2024 jyldyń qarashasynda bastalǵan edi, biraq Rýmynııa Konstıtýtsııalyq soty ony toqtatýǵa sheshim qabyldady.

Birinshi týrda (2024 jylǵy 24 qarasha) ultshyl kandıdat Kelın Djordjeský eń kóp daýys jınaǵan bolatyn. Alaıda onyń saılaý kampanııasyn zańsyz qarjylandyrǵany, daýys berý júıesine qarsy hakerlik shabýyldar sııaqty sebeptermen saılaý nátıjesi joıyldy. Bul aıyptaýlardyń keıbireýi dáleldenbegenimen, Konstıtýtsııalyq sot bul sheshimdi qabyldady.

Sottyń bul erekshe ári buryn-sońdy bolmaǵan sheshimi Rýmynııada da, shetelde de úlken daý týǵyzdy. Degenmen, el úkimeti sot sheshimin eskerip, qaıta saılaýdy 2025 jylǵy 4 jáne 18 mamyrǵa belgiledi.

Buǵan deıin Rýmynııanyń Konstıtýtsııalyq sotyna 4 mamyrdaǵy saılaý qorytyndysyn joıý týraly ótinish jiberilgeni málim boldy.