Nıgerııadaǵy jarylystan 48 adam qaza tapty

ASTANA. KAZINFORM — Nıgerııada benzın tasymaldaıtyn kólik pen iri qara mal áketip bara jatqan júk kóligi soqtyǵysynan bolǵan kúshti jarylystan kem degende 48 adam qaza tapty, dep habarlaıdy Euronews. 

Qaıǵyly oqıǵa Nıgerııanyń ortalyq-batysyna qarasty Nıger aýylsharýashylyq shtatyndaǵy kólik kóp júretin tasjolda boldy. 

Aımaqtyq tótenshe jaǵdaılar departamentiniń basshysy Abdýllahı Baba-Arabtyń aıtýynsha, apat saldarynan qaza tapqandardyń kóptiginen bólek, kem degende 50 sıyr tirideı órtenip ketken. 

Oqıǵa ornynda izdeý-qutqarý jumystary júrip jatyr, dep qosty resmı ókil.

Aqparatqa sáıkes, tótenshe jaǵdaılar qyzmeti bastapqyda 30 adamnyń denesin tapty, keıin taǵy 18 adamnyń máıiti shyqty. Qaza tapqandardy jappaı jerleý rásimi ótip jatyr. 

Oqıǵanyń mán-jaıy anyqtalýda.

Nıgerııanyń memlekettik NNPC Ltd kompanııasy ótken aptada benzın baǵasyn kem degende 39%-ǵa kóterdi, bul sońǵy ýaqytta ekinshi úlken ósim boldy.

Elde janarmaı tapshylyǵy sezilip, kólik júrgizýshileri el boıynsha saǵattap kezekte turýǵa májbúr.

Júk tasymaldaýǵa arnalǵan temirjol júıesiniń bolmaýyna baılanysty Afrıkadaǵy halyq tyǵyz qonystanǵan el Nıgerııadaǵy negizgi joldardyń kópshiliginde janarmaı tasymaldaıtyn kólikterdiń qatysýymen ólimge ákeletin apattar jıi bolady. 

Resmı derekke sensek, tek 2020 jyly benzın tasymaldaıtyn kólikterdiń qatysýymen 1531 apat bolyp, saldaryna 535 adam qaza tapqan, 1142 adam jaraqat alǵan.