Nıderlandta júrgizýshisiz avtobýs alǵash ret Rotterdam áýejaıyna qatynaıdy

ASTANA. KAZINFORM — 1 tamyzdan bastap Rotterdam qalasynyń joldarynda alǵash ret avtonomdy avtobýs júredi, dep habarlaıdy Euronews.

Nıderlandta júrgizýshisiz avtobýs alǵashqy saparyna daıyn. 1 tamyzdan bastap jolaýshylar bul kólikpen Rotterdam-Gaaga áýejaıyna jete alady.

Ótken aptada avtonomdy avtobýs alǵash ret jolǵa shyǵyp, synaqtan ótti.

Jobanyń bastapqy kezeńinde avtobýsta kólik júrgizýshisi bolady. Onyń mindeti — avtopılot júıesiniń jumysyn baqylaý. Bul — bolashaqta kólik júıesin tolyq avtomattandyrý úshin qajet.

RET avtobýs kompanııasynyń ókili Tessa Dronzek jergilikti BAQ-qa suhbat berip, qoldanystaǵy zańdar men erejeler júrgizýshisiz kólikterdiń qoǵamdyq joldarda adamnyń aralasýynsyz qatynaýyna áli ruqsat bermeıtinin aıtty.

RET kompanııasynyń basshysy Lında Být júrgizýshiler jumyssyz qalady dep alańdamaýǵa shaqyrdy.

— Qazirgi ýaqytta biz jyl saıyn júzdegen qyzmetkerdi jumysqa alyp otyrmyz. Bul bolashaqta da ózgermeıdi. Sebebi biz kadr tapshylyǵy máselesin sheshýdiń jolyn izdeýdemiz, — dedi ol.

Avtobýsta joldaǵy jaǵdaıdy baqylaýǵa arnalǵan kameralar, datchıkter men radarlar ornatylǵan. Rotterdam-Gaaga áýejaıynyń ókilderi bul kólik túriniń qaýipsiz ekenin atap ótti. Avtobýsqa qoǵamdyq jolmen júrýge Ulttyq kólik basqarmasy tarapynan jan-jaqty tekseristen keıin ruqsat berilgen.

Áýejaı ókilderiniń aıtýynsha, avtobýs qatynaıtyn baǵyt — áýejaı men Meijersplein metro stantsııasynyń arasyndaǵy jol — qarapaıym ári júrgizýshisiz kólikterge yńǵaıly.

Alaıda mamandardyń pikirinshe, mundaı avtobýstardyń jol qozǵalysyna tolyqqandy qatysýshy atanýy úshin áli birneshe jyl qajet. Sebebi qazirgi tehnologııa men quqyqtyq retteý deńgeıi bul úshin jetkiliksiz.

— Biz bul tájirıbeden sabaq alyp, odan ári damý jolyn durys josparlaýymyz kerek, — dedi RET kompanııasynyń ókili.

Júrgizýshisiz avtobýsty synaqtan ótkizý — DAM Shuttles, RET, Rotterdam-Gaaga áýejaıy, aımaqtyq bılik pen qalalyq ákimdik arasyndaǵy birlesken joba.

Budan buryn Nıderland bıligi 15 jasqa deıingi balalarǵa áleýmettik jelilerdi paıdalanýǵa tyıym salýdy usynǵany habarlandy.