Nesıege shekteý qoıylady degen ras pa

ASTANA.KAZINFORM - ️Jalǵan aqparatqa qarsy is-qımyl ortalyǵy jelide banktik nesıe berý máselelerine qatysty manıpýlıatsııalyq aqparattyń taralýy týraly eskertedi. 

Jelide azamattardyń belgili bir sanattary úshin «nesıe alý múmkindigi shekteletini» týraly habarlamalardyń belsendi taralýy tirkelip jatyr.

— Bul aqparat shyndyqqa janaspaıdy, óıtkeni nesıe berý týraly sheshimdi bankter árqashan qaryz alýshynyń tólem qabilettiligin keshendi baǵalaý negizinde qabyldaǵan jáne qabyldanady, — delingen habarlamada.

Ulttyq banktiń málimetinshe, qazirgi ýaqytta belgilengen normatıvter, sonyń ishinde shekti máni 0,5-ti quraıtyn boryshtyq júkteme koeffıtsıenti qoldanysta (Basqarmanyń 2025 jylǵy 25 tamyzdaǵy № 52 qaýlysy). Al boryshtyń tabysqa qatynasy kórsetkishi qazirgi ýaqytta taldaý satysynda jáne onyń bekitilgen máni joq.

Retteýdegi ózgerister kezeń-kezeńimen engiziledi jáne olar boıynsha resmı túsindirmeler beriledi.

— Áleýmettik jelilerdegi úzildi-kesildi jáne úreı týǵyzatyn sıpattaǵy jarııalanymdar manıpýlıatsııalyq mazmunnyń aıqyn belgisi. Olar kóbinese jasandy dúrbeleń týdyrýǵa jáne kúmándi aqyly qyzmetterdi usynýǵa baǵyttalǵan.

Ortalyq azamattardy mundaı aqparatqa syn kózben qaraýǵa, derekterdi tek resmı aqparat kózderinen tekserýge, kúmándi siltemelerge ótpeýge jáne jeke derekterdi úshinshi tulǵalarǵa bermeýge shaqyrady, — delingen habarlamada.

Aıta ketelik «7-20-25» baǵdarlamasy boıynsha da qazaqstandyqtarǵa alaıaq deldaldardan saq bolý eskertilgen edi.