Nepaldyń ýaqytsha úkimetiniń basshysy laýazymyna kandıdat tańdaldy

ASTANA. KAZINFORM — Jaqynda bolǵan narazylyqtarda sheshýshi ról atqarǵan Gen-Z qozǵalysy Nepal Joǵarǵy sotynyń burynǵy tóraǵasy Sýshıla Karkıdi ýaqytsha úkimet basshysy laýazymyna usyndy, dep News18 telearnasy. 

Nepal Joǵarǵy sotynyń birinshi áıel bas sýdıasy bolǵan Karkı jańa saılaý ótkizilgenge deıin ótpeli kezeńde eldi basqarýǵa maquldandy. Onyń kandıdatýrasy Gen-Z qozǵalysynyń vırtýaldy jınalysynda maquldandy. Jastar birlestigi Karkıdiń jaǵdaıdy turaqtandyrýǵa jáne saıası daǵdarystan shyǵýǵa kómektesetinine senimdi. 

Jańa basshy narazylyq sherýleri kezinde qaza tapqandardyń otbasylaryna qoldaý kórsetý jáne daǵdarysty eńserý úshin qoǵamdy biriktirýdi basymdyq retinde belgiledi. Karkı Nepaldaǵy jaǵdaıdyń óte qıyn kúıinde qalyp otyrǵanyn moıyndady, biraq ózgeris múmkindigine senim bildirdi. 

— Biz eldiń damýy úshin birge jumys isteımiz jáne Nepalǵa jańa bastama berýge tyrysamyz, — dep atap ótti ol.

Karkı sonymen qatar Úndistanmen berik, uzaq merzimdi baılanystyń mańyzdylyǵyna toqtalyp, ekijaqty qarym-qatynastardyń beriktigin atap ótip, kórshi eldiń basshylyǵyna joǵary baǵasyn berdi. 

Buǵan deıin Gen Z jastar qozǵalysynyń ókilderi men Nepal armııasy arasyndaǵy kelissózdiń birinshi raýndy ótip, taraptar saıası máselelerdi talqylaǵan bolatyn.

Eske sala ketsek, 8-9 qyrkúıek kúnderi bolǵan Nepalda narazylyq kezinde polıtsııanyń oq jaýdyrýy saldarynan 14 adam qaza tapty.  Sherýshiler úkimetten áleýmettik jelilerdi buǵattamaýdy jáne jemqorlyqpen kúresti kúsheıtýdi talap etti. Narazylyq bildirýshilerdiń basym kópshiligi — Z urpaǵy nemese 1995-2012 jyldar aralyǵynda týǵandar.

Nepal premer-mınıstri jappaı narazylyqtar tusynda otstavkaǵa ketti. 

Nepaldyń Lalıtpýr qalasyndaǵy Nakhý túrmesinen 1500-ge jýyq tutqyn qashyp ketti. 

Al eldiń áýejaılary 11 qyrkúıekke deıin jabyldy. 

Nepaldaǵy tártipsizdikterge baılanysty el armııasy keıbir qalalarda komendanttyq saǵatty 12 qyrkúıekke deıin uzartty.