Nepal áýejaılary 11 qyrkúıekke deıin jabyldy

ASTANA. KAZINFORM - Nepal armııasy basqa da qaýipsizdik qyzmetterimen kelise otyryp, eldegi jappaı tonaý, órt qoıý jáne vandalızm, tártipsizdik bolyp jatqan qalalardyń kóshelerine áskerlerin ornalastyrdy, dep habarlaıdy TASS agenttigi.

Bul týraly áskerılerdiń qoǵammen baılanys departamentiniń málimdemesine silteme jasap Khabarhub portaly habarlady.

Sonymen qatar Nepal armııasy Katmandýdaǵy Trıbhývan halyqaralyq áýejaıyn baqylaýǵa aldy. Bul týraly bas menedjer Hansa Radj Pandeı málimdedi.

– Nepal armııasy áýejaıdyń ishinde jáne syrtynda basqarýdy óz qolyna aldy, biz jalpy qaýipsizdikke senimdimiz, - dep keltiredi Pandeıdiń sózin Katmandu Post.

Onyń aıtýynsha, áýejaıdyń jabylýyna baılanysty júzdegen jolaýshy Nepalda ushyp-qona almaı qalǵan. Pandeı sársenbi kúni tústen keıin áýejaıdy qaıta ashý týraly sheshim qabyldamas buryn bılik qaýipsizdik jaǵdaıyn qarastyratynyn aıtty.

Buǵan deıin Nepaldyń týrıstik keńesi men jergilikti áýe kompanııalary Nepaldaǵy barlyq áýejaı 11 qyrkúıekke deıin jabyq kúıinde qalady, jabylý merzimi uzartylýy múmkin dep málimdedi.

Eske salaıyq, 8 qyrkúıekte Katmandý men Nepaldyń basqa da birqatar iri qalacynda úkimettiń sharalaryna qarsy shyqqan myńdaǵan adamnyń qatysýymen jappaı narazylyq sherýleri bastaldy.

Tártip saqtaý úshin astanaǵa áskerıler jiberilip, merzimsiz komendanttyq saǵat engizildi. Sherýshiler men polıtsııa arasyndaǵy qaqtyǵys kezinde 20-dan astam adam qaza taýyp, 500-den astamy jaralandy.

Nepaldyń Lalıtpýr qalasyndaǵy Nakhý túrmesinen 1500-ge jýyq tutqyn qashyp ketti.