Neo Nomad vızasy: Qazaqstan zamanaýı kóshpendilerdi qabyldaıdy
ASTANA. KAZINFORM — Endi zamanaýı kóshpendiler elimizde bir jylǵa deıin turyp, sheteldik kompanııalardaǵy jumysyn jalǵastyra alady.
Elimizde shetel azamattaryna arnalǵan jańa Neo Nomad vızalyq rejımi engizilgeni málim. Atalǵan vıza qashyqtan jumys isteıtin sheteldik týrısterge arnalǵan. Endi zamanaýı kóshpendiler elimizde bir jylǵa deıin turyp, sheteldik kompanııalardaǵy jumysyn jalǵastyra alady.
Baǵdarlama Memleket basshysynyń tapsyrmasy aıasynda byltyr iske qosylǵan. Jańa vızalyq rejım pandemııadan keıin osyndaı baǵdarlamalardy sátti engizgen 50-den astam eldiń halyqaralyq tájirıbesin nazarǵa alǵan. Búginde álemde zamanaýı kóshpendilerdiń sany 35 mıllıonnan asyp otyr jáne bul kórsetkish jyl saıyn artyp keledi.
Neo Nomad Visa alýdyń negizgi talaptary:
Qazaqstan aýmaǵynan tys jerde qashyqtan jumys isteý
Aı saıynǵy eń tómengi tabys — 3 000 AQSh dollarynan joǵary
Medıtsınalyq saqtandyrý
Sottylyǵy joqtyǵy týraly anyqtama
Neo Nomad Visa alǵan alǵashqy sheteldikterdiń biri — eýropalyq Jorj Roza Fılıý. Ol Astanada alty aı turýdy jáne elimizdiń birneshe óńirin týrıst retinde aralap kórýdi josparlap otyr.
— Qazaqstan halqynyń qonaqjaılyǵy, eldegi qaýipsizdik pen turaqty damý — meniń bul eldi tańdaýyma sebep boldy. Munda únemi bir qozǵalys, damý, jańashyldyqqa umtylys baıqalady. Men osy júıeniń bir bólshegi bolǵym keledi, — deıdi Jorj Roza Fılıý.
Sondaı-aq ol vızany rásimdeý úderisiniń qarapaıymdylyǵyn jáne Lıssabondaǵy Qazaqstan konsýldyǵyndaǵy qyzmet sapasynyń joǵary ekenin atap ótti. Rásimdeý ýaqyty — 5 jumys kúninen aspaıdy.
Baǵdarlamanyń ekonomıkalyq tıimdiligi de eseptelgen: máselen, 500 adam vıza alsa, el bıýdjetine shamamen 3,6 mlrd teńge tabys túsedi. Neo Nomad vızasyn paıdalanatyn sheteldik azamattar Qazaqstanda turyp, qarajatyn osynda jumsaıdy, biraq otandyq eńbek naryǵyna áser etpeıdi.
Qazirgi tańda Neo Nomad Visa-ny Ulybrıtanııa, AQSh, Frantsııa, Polsha, Ońtústik Koreıa, BAÁ jáne Taıland azamattary alǵan.
Aıta ketelik EO-nyń Qazaqstanǵa vıza rejımin jeńildetýge arnalǵan kelisim qashan bekitiletini týraly jazǵan edik.