Nemisterdiń jartysy ǵana qoǵamdyq oryndarda ózderin qaýipsiz sezinedi

ASTANA. KAZINFORM — Infratest dimap zertteý ınstıtýty júrgizgen saýalnamaǵa sáıkes Germanııa turǵyndarynyń 50%-y ǵana qoǵamdyq oryndarda ózderin qaýipsiz sezinedi, dep habarlaıdy TASS.

Derekterge súıensek, respondentterdiń tek 50 paıyzy ǵana kóshede, saıabaqtarda, qoǵamdyq kólikte nemese basqa da qoǵamdyq oryndarda ózin qaýipsiz sezinedi. Bul aqpan aıyndaǵy kórsetkishten 5% tómen. Al saýalnamaǵa qatysqandardyń 48%-y qoǵamdyq oryndardy belgili bir dárejede qaýipti dep sanaıdy.

Sonymen qatar áleýmettanýshylar erlerdiń 56%-y, al áıelderdiń 45%-y ózin qaýipsizdikte sezinetinin anyqtady. 2017 jyly ózin qaýipsiz sezinetin nemisterdiń úlesi 75% bolǵan.

Saýalnama 3-5 qarasha aralyǵynda júrgizilip, oǵan 1300 adam qatysty. 

Qoǵamdyq qaýipsizdik Germanııa saıasatyndaǵy basty baǵyt sanalady, oǵan kantsler Frıdrıh Mertstiń (CDU) kóshi-qon týraly málimdemeleri mysal bola alady. 14 qazanda Merts Germanııa bıligi kóshi-qon saıasatyndaǵy burynǵy qatelikterdi túzetip jatqanyn jáne «mıgratsııa máselesin sheshýde aıtarlyqtaı jetistikterge jetkenin» aıtqan edi.

Aıta keteıik, buǵan deıin sırııalyqtardyń kópshiligi Germanııada qalatyny týraly jarııalaǵan edik.