Nemereńiz apatqa ushyrady, tez aqsha jiberińiz: Alaıaqtar eski aıla-sharǵysyna qaıta kóshti

ASTANA. QazAqparat – Kıberqylmyskerler eski aıla-sharǵysyna kóshti. Bul týraly Іshki ister mınıstrliginiń resmı ókili Shuǵyla Turlybek aıtty, dep habarlaıdy QazAqparat tilshisi.

«Aldyn alý sharalarynyń kúsheıtilýine jáne aýyspaly abonenttik nómirlerden jasalatyn alaıaqtyq qońyraýlardyń buǵattalýyna baılanysty kıberqylmyskerler ózderiniń eski aıla-amaldaryna kóshti», - dedi ol mınıstrliktiń baspasóz qyzmeti alańynda ótken brıfıngte.

Máselen, onyń aıtýynsha, sońǵy kezde elimizde egde jastaǵy adamdarǵa jasalatyn alaıaqtyq faktileri jıilep ketken.

«Alaıaqtar úı telefonyna habarlasyp, ózderin sol kisilerdiń jaqyn týysy retinde tanystyryp, jol apatyna túskenin aıtyp, máseleni sheshý úshin aqsha suraıdy. Odan keıin telefondy polıtsııa qyzmetkerine bergendeı bolady. Al olar óz kezeginde qart adamdardyń sengishtigin paıdalanyp, jınaǵan qarajatyn jol-kólik oqıǵasynda zardap shekken adamǵa berýge nemese jaqynyn qylmystyq jaýapkershilikten bosatý úshin jumsaýǵa kóndiredi. Jábirlenýshiler aqshany berýge keliskennen keıin olarǵa kýrerdi jiberedi», - dedi Shuǵyla Turlybek.

Osyǵan oraı mınıstrliktiń resmı ókili azamattardy, ásirese qart adamdardy muqııat bolýǵa jáne beıtanys adamdarǵa senbeýge shaqyrady.

«Egde jastaǵy týystaryńyzǵa alaıaqtyqtyń osy túri týraly eskertińizder. Mundaı qońyraý túsken kezde qońyraýdy óshirip, kelip túsken aqparatty tekserý úshin atalǵan týystarmen baılanysý qajet. Aqparat rastalmaǵan jaǵdaıda «102» nómiri arqyly polıtsııaǵa dereý habarlasyńyzdar», - dedi ol.