Nelikten keıbir eldiń pasporty basqalarǵa qaraǵanda kúshtirek? — sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Bul jumbaq ırandyq qamal sizdi kóne zamanǵa jeteleıdi — ParsToday
Rýdhan Fýman qamaly Gılan oblysyndaǵy kóptegen týrısti qyzyqtyratyn oryndardyń biri, dep jazdy ParsToday aqparat agettigi.
Irandyq basylymnyń dereginshe, Rýdhan qamaly uzyn qabyrǵalary men tylsym da aıbyndy qurylymymen «Myń qadam» saraıy strategııalyq ornalasýyna baılanysty eshbir shaıqasta baǵyndyrylmaǵan eski qorǵanys ǵımaraty.
ParsToday Irannyń soltústigindegi Gılan oblysyndaǵy osy berik jáne turaqty tarıhı tartymdylyq týraly toqtalady.
Rýdhan bekinisi nemese Hesamı qamaly — Rýdhan aýylyndaǵy Fýman ýeziniń ormandy bıikterinen joǵary turǵyzylǵan Sasanıdter ımperııasy (b. z. 224-651 jj.) dáýirine jatatyn qamaldyń ataýy. Onyń, aýdany 2,6 ga, 65 munarasy men qorǵandary men qabyrǵasynyń uzyndyǵy 1,5 metr. Qabyrǵalar men munaralardyń aınalasynda balqytylǵan materıaldardy quıýǵa jáne túsirýge arnalǵan eńis tesikter bar. Bul qamal Fýman qalasynan 30 shaqyrym jerde.
Rýdhan qamalynda 65 munara men uzyndyǵy 1500 metr qabyrǵa bar.
Qale Rýdhan aýylynyń turǵyndary talashı tilinde sóıleıdi, keıbir mamandar qamal Sasanıdter dáýirinde salynǵan jáne arabtardyń Iranǵa basyp kirýimen tuspa-tus kelgen dep esepteıdi.
Qamaldyń soltústik-shyǵys shetinde óte ádemi eki qabatty ǵımarat bar, al onyń ońtústik jaǵynda úńgir bar taý bar, jergilikti turǵyndardyń aıtýy boıynsha, bul buryn shabýyl kezinde qamalǵa belgi beretin kúzetshilerdiń orny bolǵan.
Irandyq baslym bul shaǵyn tanystyrýynda Rýdhan qamalyna qalaı barýǵa bolatyny týraly da málimetter bergen.
Qytaıǵa vızasyz kirgen sheteldikterdiń sany eki esege artty — «Halyq gazeti»
Ulttyq statıstıka bıýrosy 28 aqpan kúni jarııalaǵan 2024 jylǵy Ulttyq ekonomıkalyq jáne áleýmettik damý statıstıkasy bıýlleteninde 2024 jyly elge vızasyz kirgen sheteldikterdiń sany 20,12 mıllıon bolyp, 112,3% ósken, dep habarlaıdy «Halyq gazeti» basylymy.
Sondaı-aq osy aptada «Halyq gazeti» basylymynda «2024 jyly Qytaıdyń JІÓ ótken jylmen salystyrǵanda 5,0%-ǵa ósti» degen taqyryptaǵy aqparat jaryq kórdi.
Qytaılyq BAQ-tyń dereginshe, Ulttyq statıstıka bıýrosy 2024 jylǵy Ulttyq ekonomıkalyq jáne áleýmettik damý statıstıkasy bıýlletenin shyǵardy. Aldyn ala esep boıynsha, 2024 jyly JІÓ 134,91 trıllıon ıýan bolyp, ótken jylmen salystyrǵanda 5,0%-ǵa joǵarylaǵan.
Qazaqstan men Ózbekstan tórt jańa saýda dálizin ashady — ÓzA
Ózbekstan Qazaqstanmen taýar aınalymyn keńeıtý maqsatynda tórt jańa saýda ótkelin ashýdy josparlap otyr.
Bul týraly Ózbekstan Respýblıkasynyń Qazaqstandaǵy Tótenshe jáne ókiletti elshisi Bahtıer Ibragımov Jetisý oblysynyń kásipkerlerimen kezdesý barysynda málimdedi, dep habarlaıdy «ÓzA» aqparat agenttigi.
Habarlamada aıtylýynsha, dıplomatııalyq mıssııa basshysy Ózbekstan tarapy usynǵan, eki el arasyndaǵy ekonomıkalyq baılanystardy nyǵaıtýǵa baǵyttalǵan bastamalar týraly egjeı-tegjeıli aqparat berdi.
Atap aıtqanda, qazirgi ýaqytta memlekettik shekaradaǵy baqylaý-ótkizý beketterinde jóndeý jumystary júrgizilip jatqany aıtyldy. Mundaı sharalar taýar aınalymynyń artýyna tikeleı yqpal etedi.
Búginde Ózbekstanda Qazaqstan kapıtalynyń qatysýymen myńnan astam kásiporyn tabysty jumys istep jatyr. Aıta ketý kerek, eki el arasyndaǵy ekonomıkalyq qarym-qatynastar óńiraralyq yntymaqtastyqty nyǵaıtýǵa da oń áser etedi.
— Ótken jyly Qazaqstan men Ózbekstan arasynda jalpy 4,2 mıllıard dollar kóleminde taýarlar men qyzmetter saýdasy júrgizildi. Sol kezeńde Ózbekstan Qazaqstanǵa 1,4 mıllıard dollar kóleminde ónim eksporttady, — dep jazady ózbekstandyq BAQ.
Sondaı-aq osy aptada «ÓzA»-da «Rýslan Abdýllaev kásibı bokstaǵy debıýtinde jeńiske jetti» degen taqyryptaǵy aqparat jarııalandy.
Atalǵan aqparat kóziniń dereginshe, AQSh-tyń Kalıfornııa shtatynda kezekti kásibı boks týrnıri ótip jatyr.
Áýesqoı boksta álem chempıony atanǵan qandasymyz Rýslan Abdýllaev osy týrnırde rıngke kóterildi.
Kásibı bokstaǵy debıýttik jekpe-jegin ótkizgen Abdýllaev meksıkalyq Hose Valenzýela Alvaradomen kezdesti. Jekpe-jektiń ekinshi raýndynda Rýslan Abdýllaev qarsylasyn joıqyn soqqymen tehnıkalyq nokaýtqa túsirip, jeńiske jetti.
Eske sala keteıik, Rýslan Anýaruly Abdollaev 2002 jyly týǵan, ózbekstandyq áýesqoı boksshy, ulty qazaq, birinshi jartylaı orta salmaqta óner kórsetetin Ózbekstan ulttyq quramasynyń múshesi, bokstan Azııa chempıony (2022 j), Ózbekstan jáne halyqaralyq týrnırleriniń birneshe dúrkin júldegeri.
Nelikten keıbir pasporttar basqalaryna qaraǵanda kúshtirek? — TRT
Mıllıondaǵan adam kún saıyn tólqujatymen shekarany kesip ótse de, keıbir tólqujattar ıelerine kóbirek saıahat erkindigin usynady. Bul aıyrmashylyqtyń sebebi ne?
Bul suraqtyń jaýabyn osy aptada «trt.global» basylymy bergen eken.
Atalǵan BAQ-tyń dereginshe, «Henley & Partners» jáne «Arton Capital» jarııalaǵan tólqujat ındeksteri vızasyz elder sanyna negizdelgen tólqujattardyń kúshin ólsheıdi. Sıngapýr jáne Japonııa sııaqty elderdiń tólqujattary 190-nan astam elge vızasyz kirýge múmkindik berse, Aýǵanstan, Sırııa jáne Pákistan sııaqty elderdiń tólqujattary qozǵalysty shekteıdi.
«Henley & Partners» ókili Býrak Demırel ındeks derekteriniń Halyqaralyq áýe kóligi qaýymdastyǵynan alynǵanyn jáne ártúrli derekkózder arqyly qoldaý kórsetiletinin aıtady.
Sondaı-aq, túrkııalyq basylymnyń málimetinshe, pasport kúshine áser etetin faktorlarǵa ekonomıkalyq turaqtylyq, eki jaqty saýda kólemi, halyq sany jáne vıza sharttaryn buzý statıstıkasy kiredi.
— Kóshi-qon jónindegi sarapshy Ýgýr Altýndal Jalpy ishki ónim kórsetkishi joǵary elderdiń tólqujattary kúshtirek, óıtkeni bul elderden qajetsiz kóshi-qon qaýpi tómen ekenin aıtady. Keıbir elderdiń Shengen vızasyna qatysty máseleleri ulttyq biregeılik pen mádenıetke negizdelgen kemsitýshilik saıasattyń bar ekenin kórsetedi. Saıası turaqsyzdyq pen ishki janjaldar tólqujat kúshine de keri áser etedi, — dep jazady trt.global.