Negizgi zańnyń mátini barshaǵa túsinikti ári qoljetimdi tilmen jazylýy tıis — Ádilet mınıstri
ASTANA. KAZINFORM — Usynystardyń aýqymy men talqylaýdyń tereńdigi jańa Konstıtýtsııaǵa kóshý úshin obektıvti negiz qalyptastyryp otyr. Bul týraly Konstıtýtsııalyq reformalar jónindegi komıssııanyń otyrysynda Ádilet mınıstri Erlan Sársembaev aıtty.
— Negizgi zańnyń mátini barshaǵa túsinikti ári qoljetimdi tilmen jazylýy tıis ekendigine erekshe nazar aýdarǵan bolatynmyn. Búgin biz adamdy, onyń ómiri, quqyqtary men bostandyǵy basty qundylyq retinde aıqyndaıtyn Ádiletti Qazaqstannyń konstıtýtsııalyq qundylyqtaryn naqty bekitýdi qajet etetin jańa saıası-quqyqtyq jaǵdaıda turmyz. Búgin talqylanyp otyrǵan túzetýler Konstıtýtsııanyń búkil qurylymyn — preambýladan bastap qorytyndy jáne ótpeli erejelerge deıin qamtıdy, — dedi mınıstr.
Onyń málimetinshe, ózgerister qoldanystaǵy Konstıtýtsııa mátininiń 80 paıyzdan astamyn qozǵaıdy. Al mátinniń jartysynan astamy ózgertilgen jaǵdaıda jańa redaktsııa qabyldaý qajettiligi týyndaıdy.
— Eń mańyzdysy, biz jekelegen túzetýlerdi talqylap otyrǵan joqpyz. Biz eldiń basty jarııa-quqyqtyq aktisi. Negizgi zańnyń arhıtektýrasyn qaıta talqylap jatyrmyz. Usynystardyń aýqymy men talqylaýdyń tereńdigi jańa Konstıtýtsııaǵa kóshý úshin obektıvti negiz qalyptastyryp otyr. Bul konstıtýtsııalyq modeldi keshendi ári ishki turǵydan úılesimdi jańartýdy bildiredi. Osyǵan baılanysty sizderdiń qoldaýlaryńyzben sóz Qazaqstan Respýblıkasynyń jańa Konstıtýtsııasyn qabyldaý jaıynda bolýy kerek, — dedi Erlan Sársembaev.
Buǵan deıin Ádilet mınıstri Konstıtýtsııada zań kómegin kórsetý túrlerin «tegin» degen sózben shektememeý kerektigin aıtqan edi.