Nazym Qyzaıbaı álem chempıonaty fınalyna shyqty

ASTANA. KAZINFORM — Nazym Qyzaıbaı Anglııanyń Lıverpýl qalasynda World Boxing aıasynda ótip jatqan álem chempıonaty fınalyna joldama aldy.

Otandasymyz 48 kelige deıingi salmaqtyń jartylaı fınalynda ózbekstandyq Sabına Bobokýlovamen judyryqtasty.

Birinshi raýndta Nazym Qyzaıbaı 5:0 esebimen jeńse, ekinshi kezeń 2:3 esebimen ózbekstandyq boksshynyń paıdasyna aıaqtaldy. Degenmen úshinshi raýndta Nazym taǵy da basymdyǵyn tanytty.

Nazym álem birinshiliginde úsh márte top jarsa, bir márte qola júldeger boldy.Sondaı-aq ol 2021 jyly Azııa chempıony atanyp, 2024 jyly Parıj Olımpıadasynda qola júldege qol jetkizdi.

Endi el quramasynan Mahmud Sabyrhan (55 keli), Alýa Balqybekova (51 keli), Tórehan Sabyrhan (70 keli), Natalıa Bogdanova (70 keli) fınal joldamasyn sarapqa salady.

Dúbirli doda 4-14 qyrkúıek aralyǵynda Anglııanyń Lıverpýl qalasynda ótedi. Jekpe-jekter «Qazaqstan» jáne «Qazsport» telearnalarynan tikeleı efırde kórsetiledi.
Álemniń ár qıyrynan kelgen boksshylar 4-10 qyrkúıek aralyǵynda irikteý kezeńinde baq synaıdy. Al 12-13 qyrkúıekte jartylaı fınaldyq, 13-14 qyrkúıekte fınaldyq básekeler ótedi.