«Naýryz jumysker». Alǵashqy páterdi kim alǵany belgili boldy

ASTANA. KAZINFORM — «Naýryz jumysker» baǵdarlamasy boıynsha alǵashqy zaemdy qostanaılyq ınjener-konstrýktor aldy, dep habarlaıdy «Otbasy bank».

Naýryz merekesi qarsańynda Qostanaı qalasynyń turǵyny Danııar Asanovtyń armany oryndaldy. Ol 2 bólmeli páterdiń ıesi atandy.

Injener-konstrýktor «SaryarqaAvtoProm» JShS-de jumys isteıdi. Eki kún buryn ol «Naýryz jumysker» baǵytyna qatysýǵa ótinim berip, búginde Qazaqstan boıynsha eń alǵashqy bolyp qoljetimdi nesıe aldy.

Danııar Asanov «BK-Stroı» qurylys kompanııasy salyp jatqan turǵyn úıden páter tańdady. Bul páterler árlengen kúıinde beriledi, ıaǵnı «Naýryz jumysker» qatysýshysy úshin bastapqy jarna 10% ǵana quraıtyn bolady. Atalmysh nysanda aýdany 60 sharshy metr páter qurylys kezeńinde 24,3 mln teńge turady.

— Óte qýanyp turmyn, birneshe kún ishinde ómirim kúrt ózgerdi. Jańalyǵymdy otbasyma jáne jaqyndaryma qýana jetkizdim. Osyǵan deıin men anammen birge jaldamaly páterde turyp keldim. Jaqynda biz ózimizdiń jeke páterimizde qonys toıyn toılaıtyn bolamyz. Endi otbasyn qurý týraly da oılanýǵa bolady, — deıdi «Naýryz jumysker» baǵytynyń qatysýshysy Danııar Asanov.

Baǵdarlama qatysýshylarynyń baspana izdep jáne satyp alý úshin alty aıy bar. Óńirler úshin eń joǵary qaryz somasy 30 mln teńgeni, Astana men Almaty úshin — 36 mln teńgeni quraıdy.

Megapolıster men oblys ortalyqtarynda tek bastapqy turǵyn úı satyp alýǵa bolady. «Baspana market» portalynda (otbasybank.kz) qatysýshylar qolaıly turǵyn úı kesheni men páterlerdi tańdaı alady. Al qaıtalama naryqtaǵy turǵyn úıdi monoqalalar men aýyldyq eldimekenderden satyp alýǵa bolady.

— «Naýryz jumysker» baǵyty-barshaǵa belgili «Naýryz» baǵdarlamasynyń bir bóligi. Bıyl ol qazaqstandyqtar úshin odan da qoljetimdi jaǵdaılarmen jumys isteıdi, bul azamattardyń qarajatyn únemdeýge jáne turǵyn úı satyp alýdy tıimdirek etýge múmkindik beredi. Endi árlengen páterlerdi tańdaǵanda, qaryz somasynyń nebári 10% mólsherinde, biraq 2 mıllıon teńgeden kem túspeıtin bastapqy jarna engizý jetkilikti. Bul optsııa qurylys salýshylar úshin paıdalanýǵa berilgen árlengen turǵyn úıdiń úlesin ulǵaıtýǵa yntalandyrady. «Naýryz jumysker» mysalynda qurylys kompanııalary óz klıentterine bir qadam alǵa jyljyp, árlengen úılerdi kóptep tapsyryp jatqanyn kórip otyrmyz. 2025 jyly, bizdiń boljamymyz boıynsha, óńirlerde osyndaı 1557 páter usynylady. Bul statıstıka áli de óse túsedi dep kútemiz. Óıtkeni, «Naýryz jumysker» boıynsha bizdiń alǵashqy qaryz alýshylarymyz taza árleýde turǵyn úı satyp alýdy jón kóredi, — dep atap ótti «Otbasy bank» basqarma tóraǵasynyń orynbasary Nurlan Aqshanov.

«Naýryz jumysker» baǵyty boıynsha ótinimderdi qabyldaýdyń alǵashqy úsh kúninde Otbasy bank («Báıterek» holdınginiń enshiles uıymy) 31 mlrd teńge somasyna 1094 ótinimdi sátti qabyldady.

Ádette, «Naýryz jumysker» qatysýshylary turǵyn úıler salýmen, elektr energııasyn óndirýmen, berýmen jáne taratýmen, avtomobılder óndirýmen, ken óndirýmen, munaı óńdeý ónimderi men gaz óndirýmen aınalysatyn iri kásiporyndarda eńbek etedi.

«Naýryz jumysker» qatysýshysynyń ortasha jasy — 31 jas. Maquldaýdan ótken 974 qatysýshynyń 20%-y áıelder. Bankten suratylatyn qaryzdyń ortasha somasy — 29 mln teńge.

«Naýryz jumysker» qatysýshysynyń eń tómengi jasy — 19 jas, eń joǵary jasy — 62 jas.

«Naýryz jumysker» baǵyty boıynsha ótinimderdi qabyldaý bólingen qarjylandyrý lımıti aıaqtalǵan sátke deıin sozylady. 2025 jyly Otbasy bank jańa baǵytyn iske asyrýǵa 72 mlrd teńge baǵyttaıdy, bul qarajat 2 440 jumysshy kásipteriniń ókilderine qoljetimdi qaryz alýǵa múmkindik beredi.

Buǵan deıin 17 naýryzda «Naýryz jumysker» baǵdarlamasyna ótinim qabyldaý bastalatyny belgili boldy.