Naýqastar tegin dári-dármekti alǵanyn SMS arqyly rastaıdy - Eljan Birtanov

ASTANA. QazAqparat - QR Densaýlyq saqtaý mınıstrligi halyq tegin berilýi tıis dári-dármektiń satylymǵa shyqpaýyn qadaǵalaıdy. Bul týraly QazAqparat tilshisi QR Densaýlyq saqtaý mınıstri Eljan Birtanovqa silteme jasap habarlaıdy.

Tegin dári-dármekti alǵan naýqastar SMS nemese mobıldi qosymsha arqyly mınıstrlikke habar berýi tıis.

«SMS-habarlama boıynsha ótken jyly júrgizilgen pılottyq joba kelesi jyly iske qosylady. SMS-pen rastaý arqyly tegin dári-dármektiń satylyp ketpeı, naýqastyń qolyna tıgenine kóz jetkizip edik. Sonymen birge, kelesi jyly arnaıy mobıldi qosymsha shyǵaramyz. Onda naýqas óz retseptilerin kórip, dáriniń ýaqytyly jetkenin mınıstrlikke habarlaı alady», - dedi mınıstr  Ortalyq kommýnıkatsııalar qyzmetinde ótken brıfıngte.

Sonymen birge, E. Birtanov tegin dári-dármekter tizimine kiretin preparattardyń ǵana tegin beriletinin eske saldy.

«Keı jaǵdaıda dárigerler durys túsindirmeıdi. Arnaıy tizimdegi dári-dármekter ǵana tegin beriledi. Qalǵan dáriler memlekettiń kepildigine kirmeıdi. Tegin dárilerdi emdeýge qajetti 100 paıyz dári-dármektiń 30 paıyzy dep aıtýǵa bolady. Bul kórsetkishti jyl saıyn ulǵaıtyp jatyrmyz, degenmen qazirgi tizim osy», - dedi ol.

Mınıstr tegin dári-dármekti ýaqytynda ala almaǵan naýqastardyń shaǵymdanýy qajettigin eske saldy.

«Tegin dári jetkizilmegen naýqastar Farmatsııa komıtetiniń jergilikti departamentine telefon soǵyp, habar bergeni jón. Barlyq faktilerdi mindetti túrde tekserip, qajetti ákimshilik jáne quqyqtyq sheshimderdi qabyldaımyz, - dedi Eljan Birtanov.