Naýqastar AITV juqtyrǵan Almaty aýrýhanasynyń bas dárigeri qyzmetinen ketti

ALMATY. QazAqparat - Almatydaǵy Ortalyq qalalyq klınıkalyq aýrýhananyń bas dárigeri Narıman Tabynbaev qyzmetinen bosatyldy. Bul mekemede taıaýda naýqastar AITV (VICh) ınfektsııasyn juqtyrǵan bolatyn, dep habarlaıdy QazAqparat tilshisi.

Almaty qalalyq Qoǵamdyq densaýlyq saqtaý departamentiniń málimetinshe, Narıman Tabynbaev 1 tamyzda densaýlyǵyna baılanysty qyzmetinen bosatyldy.

Baıqaý keńesiniń konkýrsy ótkenge deıin 1 qyrkúıekten bastap «Ortalyq qalalyq klınıkalyq aýrýhana» dırektorynyń mindetin atqarýshy laýazymyna Serikjan Sabyralıev taǵaıyndaldy.

Serikjan Sabyralıev 2007 jyly S. D. Asfendııarov atyndaǵy Qazaq ulttyq medıtsına ýnıversıtetin «emdeý isi» mamandyǵy boıynsha, 2008 jyly M. Álıev atyndaǵy Qazaqstan medıtsına ýnıversıtetin «ýrologııa» mamandyǵymen ınternatýrany aıaqtady. Densaýlyq saqtaý magıstri. 2015 jyly - City University LONDON-da (London, Ulybrıtanııa) «Densaýlyq saqtaý salasyndaǵy saıasat jáne menedjment» mamandyǵymen magıstratýrany aıaqtaǵan.

Eske sala keteıik, bıylǵy maýsym aıynda Almaty Ortalyq klınıkalyq aýrýhanasynda jatqan úsh naýqastan AITV anyqtalǵanyn habarlaǵan edik.

Keıin Densaýlyq saqtaý mınıstrligi 3 patsıenttiń isin arnaıy komıssııa tekserip jatqanyn málimdedi.

Shilde aıynyń sońynda atalǵan aýrýhananyń bas dárigeri qyzmetinen shettetildi.

Sonymen qatar Densaýlyq saqtaý vıtse-mınıstri – Bas memlekettik sanıtarııalyq dáriger Aıjan Esmaǵambetova AITV juqtyrý faktisi boıynsha kinálilerdi anyqtaý úshin tekserý barysynyń barlyq materıaly tıisti organdarǵa jiberilgenin aıtty.