NATO sammıti Taıaý Shyǵystaǵy qaqtyǵystardy talqylamaıdy

ASTANA. KAZINFORM – 24–25 maýsymda Gaagada ótetin NATO sammıtinde Taıaý Shyǵystaǵy jaǵdaı qaralmaıdy, dep habarlaıdy TASS.

Málimetke sáıkes, qazirge deıin áskerı odaqqa múshe elderdiń basshylary bul máseleni talqylaıtyn resmı jospar qurmaǵan. Alaıda keı derekkózder atap ótkendeı, AQSh prezıdentiniń Iranǵa yqtımal shabýyl jaıly aıtqan pikiri bul jıynǵa belgisizdik ákelip otyr. Odaq ókilderi kezdesý naqty ári josparly túrde ótedi dep úmittengen bolatyn.

Sammıt baǵdarlamasy qysqarǵan. Buǵan prezıdenttiń Kanadada ótken aldyńǵy jıynnan erte ketýi de áser etken. Gaagadaǵy jıyn qorytyndysynda aýqymdy málimdeme emes, qysqa ǵana resmı habarlamalar jasalmaq.

Jıyn kestesinde eki ǵana negizgi shara qarastyrylǵan: saltanatty qabyldaý men bir otyrys. Burynǵydaı eki ne úsh jıyn ótkizilmeıdi. Ýkraına basshysy jıynǵa emes, tek resmı qabyldaýǵa shaqyrylǵan. Sonymen qatar, Ýkraına men NATO arasyndaǵy keńes te ótkizilmeıdi.

Derekkózder bul jaǵdaıdy paıdalanyp, keıbir el basshylarynyń áskerı shyǵyndardy ishki jalpy ónimniń 5 paıyzyna deıin arttyrý týraly usynys aıtýy múmkin ekenin joqqa shyǵarmaıdy. AQSh basshysy osy talapty sammıt barysynda erekshe atap ótýi yqtımal.

Aıta ketelik Halyqaralyq atom energııasy jónindegi agenttik (MAGATE) Irannyń Arak qalasy mańynda salynyp jatqan ıadrolyq nysanǵa soqqy jasalǵanyn rastaǵan edi.