Natalıa Godýnova: Aýyldy qoıyp, astananyń ózinde ınternet jetpeı jatqan jerler bar

NUR-SULTAN. QazAqparat – Respýblıkalyq bıýdjettiń atqarylýyn baqylaý jónindegi Esep komıtetiniń tóraǵasy Natalıa Godýnova «Qazaqtelekom» kompanııasyna júrgizilgen memlekettik aýdıt týraly málimet berdi, dep habarlaıdy QazAqparat tilshisi.

«Kvazımemlekettik sektorǵa tekserý júrgizgen kezde «Qazaqtelekomǵa» memlekettik aýdıt jasaldy. Bul jerde biz eki strategııalyq problema kórip otyrmyz. Aýyldardyń kóbinde ınternet joq. Saldarynan respýblıka aýmaǵynda balalardyń bári birdeı deńgeıde bilim alýyn qamtamasyz ete almaımyz.

Ekinshiden, ınternet joq jerdegi halyqqa oblys ortalyqtarynyń turǵyndary emin-erkin alatyn memlekettik qyzmetterdi kórsete almaımyz. Ári ketse aýdan ortalyqtarynda, kommýnıkatsııalarǵa jaqyn ornalasqan kentterde ǵana ondaı múmkindik bar», - dedi ol «Tsıfrlyq Qazaqstan» baǵdarlamasynyń aralyq nátıjesin talqylaǵan jıynda.

Sondaı-aq ol baılanys operatorlarynyń paıdakúnemdiginiń kesirinen astananyń ózinde ınternet joq jerler bar ekenin aıtty.

«Tipti astananyń ózinde, Almaty aýdanynda, keıbir kentterde ınternet joq. Operatorlar ol jerlerge ınternet tartýdyń tabysy az ekenin aıtady. Biraq operatorlardyń budan basqa tabysy óte joǵary jobalary bar ǵoı. Tabysty sol jobalardyń esebinen toltyrýǵa bolady. Internetpen jabdyqtaý kólemi 100 paıyz bolýy kerek. Mınıstr durys aıtyp otyr. Onyń ústine «Qazaqtelekomnyń» 51 paıyzyna memleket ıelik etedi.

Qazir uıaly telefon arqyly memlekettik qyzmet alatyn kezge jettik. Al aýyldaǵylar áli kúnge deıin mekenjaı anyqtamasyn alý úshin 100 shaqyrym jerdegi aýdan ortalyǵyna baryp júr», - dedi Natalıa Godýnova.