NASA Aıǵa zymyran ushyrdy

ASTANA. QazAqparat – AQSh-tyń NASA ǵarysh agenttigi Florıdadaǵy Kanaveral múıisinen tarıhtaǵy eń qýatty SLS («Ǵaryshqa ushyrylym júıesi») zymyranyn ushyrdy. Bul adamdy Aıǵa qaıtarýǵa arnalǵan jańa amerıkalyq baǵdarlama – «Artemıda» (Artemis), dep habarlaıdy QazAqparat VVS-ge silteme jasap.

Bul pılotsyz ushyrylym boldy, mıssııanyń maqsaty – tehnologııany tekserý jáne 2024 jyly «Artemıda-2»-ni ekıpajben birge ushyrý.

100 metrlik zymyran keleshekte ishinde ǵaryshkerler bolatyn «Orıon» kapsýlasyn Aıǵa qaraı shyǵarýy tıis. Adamdar sońǵy ret Aıǵa 1972 jyly jeltoqsanda «Appolon-17» mıssııasynyń ushyrylymy kezinde qonǵan edi.
Jeltoqsan aıynda NASA «Apollon-17» ushyrylymynyń 50 jyldyǵyn atap ótedi.

Uzaq úzilisten keıin jáne tolyǵymen jańadan jabdyqtalǵan Aıdyń jańa baǵdarlamasynyń birinshi ushyrylymy pılotsyz bolady. Ushyrylym tehnologııalardyń tıimdiligin tekserýge baǵyttalǵan.
Bul – «Artemıdany» ushyrýǵa jasalǵan úshinshi áreket. Tehnıkalyq sebepterge baılanysty qyrkúıek pen qazan aılarynda ushyrylymdar keıinge qaldyrylǵan edi. Injenerler zymyrannyń negizgi satysynyń barlyq tórt úlken qozǵaltqyshy ushýǵa tolyq daıyn ekenine senimdi bolmady.
Bul joly zymyran Kennedı ǵarysh ortalyǵynan jergilikti ýaqyt boıynsha 01:47-de (Grınvıch boıynsha 06:47) ushyp ketti.
«Orıon» kemesi 26 kún jolda bolady. Ázirleýshiler kemeniń múmkindikterin teksere alýy úshin ekıpajdyń 2024 jylǵy mıssııasy 21 kúnge sozylady dep boljanýda.
Mıssııa kezinde Aı betine eń jaqyn qashyqtyq – 100 km, eń alys – 70 myń km. Keme 11 jeltoqsanda Jerge oralady.

Foto: reuters.com