NASA Aıǵa ushatyn mıssııaǵa keri sanaqty bastady

ASTANA. KAZINFORM - AQSh-tyń Ulttyq aeronavtıka jáne ǵarysh keńistigin zertteý basqarmasy — NASA — «Artemıda-2» Aı mıssııasynyń ushyrylymyna 50 saǵattyq keri sanaqty bastady. Ushyrylym 1 sáýir kúni AQSh-tyń shyǵys jaǵalaýy ýaqytymen 18:24-ke (2 sáýir, Ortalyq Eýropa ýaqytymen 00:24) josparlanǵan, dep habarlaıdy Deutsche Welle.

«Orıon» ǵarysh kemesiniń bortynda tórt astronavt bolady: Rıd Ýaızman, Djeremı Hansen, Krıstına Koh jáne Vıktor Glover. Vıktor Glover Aı mıssııasyna qatysatyn alǵashqy afroamerıkalyq bolsa, Krıstına Koh — osyndaı mıssııaǵa qatysqan alǵashqy áıel astronavt atanady.

Space Launch System (SLS) zymyran-tasyǵyshy «Orıonmen» birge Florıdadaǵy Kennedı atyndaǵy ǵarysh ortalyǵynyń 39A ushyrý alańyna 20 naýryzda ornatylǵan. Bastapqyda ushyrylym 2026 jyldyń naýryzyna josparlanǵan, alaıda zymyranǵa gelıı berý júıesindegi tehnıkalyq aqaýlarǵa baılanysty keıinge shegerilgen.

«Artemıda-2» mıssııasy amerıkalyq Aı baǵdarlamasynyń ekinshi kezeńi bolmaq. 10 kún ishinde ekıpaj Aıdy aınalyp ushyp, Jerge qaıta oralady. Baǵdarlamanyń alǵashqy kezeńi — «Artemıda-1» — 2022 jyldyń jeltoqsanynda aıaqtaldy: «Orıon» Aıǵa ushqyshsyz sapar jasap, Jerge aman qaıtqan. Úshinshi kezeń — «Artemıda-3» — 50 jyldan astam ýaqyttan keıin adamdardy Aıǵa qaıta qondyrýdy kózdeıdi.

2019 jyly jarııalanǵan «Artemıda» baǵdarlamasy Aıǵa turaqty mıssııalardy jolǵa qoıýdy jáne bolashaqta Marsqa ushýlar úshin aralyq baza qurýdy maqsat etedi.

Buǵan deıin NASA Aıǵa qoný merzimin 2028 jylǵa shegergeni habarlanǵan. Keıin agenttik Aıda baza salý jáne ıadrolyq ǵarysh kemesin ushyrý josparyn jarııalaǵan edi.

Osyǵan deıin túrik dárigeriniń NASA astronavtarynyń densaýlyǵyn tekseretini týraly jazdyq.