N.Nazarbaev: Men qandastarymyzdyń kóbirek kelgenin qalaımyn

ASTANA. QazAqparat - Qandastarymyzdy demep, qoldaý kórsetý kerek. Búgin aǵymdaǵy jyldy qorytyndylap, jýrnalısterge bergen suhbatynda Elbasy Nursultan Nazarbaev osylaı málim etti.

«Bul baǵyttaǵy saıasat ózgermeıdi. Bizge keletin aǵaıyndar - qazaqtar jáne olarǵa ár ýaqytta esik ashyq. Jaǵdaıyn jasaımyz. Oralmandar jóninde jańadan qabyldanǵan zańdy bilesizder, ıaǵnı olarǵa qujat tapsyrý, azamattyq berý máselesin jeńildettik», - dedi Memleket basshysy. Osy oraıda Elbasy Táýelsizdik alǵaly beri Qazaqstanǵa 1 mıllıon qandasymyz qabyldanǵanyn aıta kele, bul turǵyda keıbir qıyndyqtar bolǵanyn, alaıda bunyń barlyǵy eńserilip, jaǵdaı jasalǵanyn jetkizdi. «Keıingi kezderde bundaı sharalardy Qazaqstan men Germanııa jasady. Biraq Germanııa tarapy burynǵydaı jappaı qabyldaýdy qoıdy, ıaǵnı qazir kerek adamdardy ǵana alady. Mysaly, mamandyǵy bolýy kerek, jasy ortasha bolýy qajet, sondaı-aq eńbegimen elge óziniń úlesin qosýy tıis. Qazaqstan tarapy eshqandaı shekteý qoıyp otyrǵan joq. Biz barlyǵynyń kelgenine qýanyshtymyz. Halyq sanyn 20 mıllıonǵa jetkizemiz dep talpynyp otyrǵan elmiz. Qudaıǵa shúkir, ishki ósimimiz de bar, syrttan kelgen aǵaıyn da oǵan úlesin qosyp jatyr», - dedi Prezıdent. N.Nazarbaev qandastarymyzǵa qoltyǵynan demep jiberip, qoldaý kórsetý kerektigin atap ótti. «Men adamdardyń kóbirek kelgenin qalaımyn. Qazir jaǵdaı qıyndaý bolǵanymen, degenmen de kómektesip jatyrmyz. Sondyqtan bul baǵyttaǵy saıasat ózgermeıdi»,- dep túıdi Prezıdent.