MJÁ bilim berý salasynda iske asyrylady
Jeke ınvestorlardy jol, gaz qubyry, aýrýhanalar, mektepter jáne basqa da nysandar qurylysyna ǵana emes, sonymen birge, olardy qaıta jańǵyrtýǵa jáne tehnıkalyq qyzmet kórsetýge tartýdyń da mańyzy zor»,- dep málimdedi Memleket basshysy Nursultan Nazarbaev Qazaqstan halqyna arnaǵan Joldaýynda.
Elbasynyń tapsyrmasyn nazarǵa ala otyryp, birqatar óńirlerde MJÁ tetigin iske asyrý sharalary qarastyrylýda. Bul týraly Úkimettiń selektorlyq otyrysynda Bilim jáne ǵylym mınıstri Erlan Saǵadıev habarlady. Mınıstrdiń aıtýynsha, mektepke deıingi bilim jáne tárbıe berý salasynda elimizde 18 balabaqshanyń qurylysy júrgizilýde. Onyń 11-i - Shyǵys Qazaqstan, 3-ýi - Mańǵystaý, 3-ýi - Soltústik Qazaqstan oblystarynda. Atap aıtarlyǵy, bıyl Shyǵys Qazaqstan oblysynda MJÁ tetigi sheńberinde bıznestiń qarajaty esebinen 2142 oryndyq 29 jekemenshik balabaqshalar ashylǵan. Bul qurylysqa 1 mlrd. teńge jumsalypty. Mundaı aqparat Shyǵys Qazaqstan oblysy ákiminiń Ortalyq kommýnıkatsııalar qyzmetindegi brıfınginde taratyldy.
Mınıstrdiń aıtýyna qaraǵanda, orta jáne kásiptik-tehnıkalyq bilim berý salasynda MJÁ tájirıbesin Qyzylorda oblysy belsendi qoldanýda. Mınıstr 2016 jyly atalǵan oblysta 11 jalpy bilim beretin mektepterdiń, Qyzylorda qalasynda boı kóteretin 200 oryndyq jataqhanasy bar, 600 adamǵa arnalǵan kásiptik-tehnıkalyq kolledjdiń qurylysynyń kontsessııalyq qujattamasy daıyndalatynyn habarlady. MJÁ boıynsha joǵary bilim berý salasynda Almaty qalasynda 2 joba júzege asyrylýda. Birinshisi - «Dárigerlik-bıologııalyq klasterdi uıymdastyrý. 504 oryndyq medıtsınalyq ortalyqty salý» dep atalady. Ekinshisiniń ataýy - «Ál-Farabı atyndaǵy QazUÝ-de ınnovatsııalyq klasterdi uıymdastyrý». Innovatsııalyq klasterdiń quramyna: bıznes-ınkýbator, tehnopark, óndiris ortalyǵy, ǵylymı-zertteý ınstıtýtynyń zerthanalyq korpýstary, jas ǵalymdar úıi, 1287 oryndyq jataqhana qurylysy kiredi.
Qazirgi kezde jataqhanadaǵy oryndar tapshylyǵy 13 288-di quraıdy. Osyǵan oraı, Bilim jáne ǵylym mınıstrligi joǵary oqý oryndaryna jekemenshik ınvestor tabýǵa qatysty tıisti usynystar bergen. «Qazir jumys berýshilerdiń esebinen joǵary oqý oryndary men kolledjderde 10 myńnan astam stýdentter oqıdy. Elimizdegi 3259 mektepte, 462 kolledjde, 65 joǵary oqý ornynda qamqorlyq keńesteri jumys isteıdi. Sondaı-aq, elimizdegi 9 joǵary oryndarynda baqylaýshylar keńesi bar. Olardyń quramyna iri kompanııalar men qoǵamdyq uıymdar kiredi»,- dedi E. Saǵadıev.
Atap aıtarlyǵy, MJÁ tetigin mınıstrlik joǵary oqý oryndaryn tirkeý, bilim berý baǵdarlamalaryn daıyndaý, stýdentterdiń praktıkasy men oqytýshylardyń tájirıbeden ótýin uıymdastyrýǵa da belsendi paıdalanýda. Memlekettik bilim berý jınaqtaý júıesi - MJÁ-ti damytýdyń aıqyn quraly. Jınaqtaý júıesi tabysyna qaramastan halyqtyń barlyq toptaryna qoljetimdi. Bolashaqta bilim alǵysy keletin árbir jas alǵashqy jarnany (5946 teńge) tólep, memlekettik bilim berý jınaqtaý júıesine aqsha salýǵa quqyly. Tıimdiligi, bul salymǵa tek bankiniń syıaqysy ǵana emes, jyl saıynǵy memleket syılyqaqysy da qosa aýdarylady. 10 mln. teńgege deıin salymdy saqtaýǵa Qazaqstannyń salymdarǵa kepildik berý qory kepildik beredi. Jınaqtaý merzimi 3-ten 20 jylǵa deıin. Árıne bul jınaqtaý júıesiniń artyqshylyǵy bolyp tabylady. Resmı aqparat boıynsha, búginge deıin 13 myńnan astam qazaqstandyqtar jınaqtaý júıesine salym engizgen.
