Mıýnhende oqıtyn eki qazaq stýdenti din-aman

ASTANA. QazAqparat - Frantsııanyń Nıtstsa qalasyndaǵy oqıǵa qazaqstandyqtar úshin de tragedııaǵa aınalǵany belgili. Shyny kerek, terakt kezinde Qazaqstannyń bir emes, tórt azamaty qaza tabady dep oılamaǵan edik. Sondyqtan, qazir shet elderde oryn alǵan kez kelgen oqys oqıǵada aldymen óz azamattarymyzdyń amandyǵyn bilýge asyǵatyn boldyq.

Ókinishke qaraı, keshe Mıýnhen qalasynda da qarýly qylmysker onshaqty adamnyń ómirin qıdy. Oqıǵa qaladaǵy iri saýda ornynda bolǵandyqtan, ol jerde kez kelgen ult ókiliniń júrýi ábden múmkin edi. Sondyqtan, demalys kúnine qaramastan, tańerteńnen beri QR Syrtqy ister mınıstrliginiń, Germanııadaǵy Qazaqstan Elshiliginiń, Mıýnhendegi Qazaqstan Konsýldyǵynyń, «Bolashaq» qaýymdastyǵynyń telefonyna tynym bermeı, biz sol eldegi azamattarymyz ben stýdentterimiz jaıly aqparat jınadyq. Іzdenisimiz zaıa ketpeı, Mıýnhende «Bolashaq» baǵdarlamasy arqyly bilim alyp júrgen eki qazaq stýdentiniń aman ekeninen habardar boldyq. 

«Mıýnhen qalasynda «Bolashaq» baǵdarlamasy boıynsha Aıan Isahanov pen Bıbigúl Shektibaeva atty eki stýdent bilim alady. Olarǵa habarlastym. Ekeýi de aman-esen»,-dedi «Bolashaq» baǵdarlamasynyń Berlındegi ókili Aıman Áýbákirova. 

Germanııadaǵy Qazaqstan Elshiliginiń qyzmetkerleri habarlaǵandaı, keshegi oqıǵadan keıin elshilik qyzmetkerleri Mıýnhen qalasyndaǵy  jáne jalpy Germanııada júrgen Qazaqstan azamattaryna saqtyq sharalary týraly aıtyp, demalys kúnderi adam kóp jınalatyn oryndarǵa barmaýǵa keńes bergen. QR Syrtqy ister mınıstrligi baspasóz qyzmetiniń jetekshisi Ánýar Jaınaqov málim etkendeı, sońǵy aqparat boıynsha Mıýnhendegi atys kezinde qaza tapqandardyń arasynda Qazaqstan azamattary joq. Al, jalpy, qalada Qazaqstannyń neshe azamaty bilim alyp, jumys isteıdi degen suraqtyń jaýabyn tek resmı saýal arqyly bilýge bolatynyn aıtty.