Mýzeı túni: Almatylyqtar 18 mamyrda mádenı nysandardy tegin aralaı alady
ALMATY. KAZINFORM – Almatyda Halyqaralyq mýzeıler kúni qarsańynda «Mýzeı túni» aktsııasy ótedi.
Bıylǵy aktsııa Halyqaralyq mýzeıler keńesi bekitken «Árqıly álemdi bir arnaǵa toǵystyrǵan mýzeıler» taqyrybyna arnalady.
Ulttyq ortalyq mýzeı
18 mamyrda Qazaqstan Respýblıkasy Ulttyq ortalyq mýzeıi saǵat 09:00-den 23:00-ge deıin qala turǵyndary men qonaqtaryn qabyldaıdy. Kelýshilerge kórme, teatrlandyrylǵan qoıylym, kontsert, sheberlik sabaqtary, kvestter, kınokórsetilimder, VR-baǵdarlama men tarıhı keıipkerlermen kezdesý uıymdastyrylady.
– «Mýzeı túni» dástúrli is-shara ǵana emes, qala turǵyndary men qonaqtar úshin mańyzdy mádenı oqıǵaǵa aınalyp otyr. Biz mýzeıdiń tarıh, óner men zamandyq tehnologııalar toǵysqan iri keńistik ekenin kórsetkimiz keledi. Bıylǵy baǵdarlama odan da aýqymdy boldy, jobanyń kóbin Halyqaralyq mýzeıler kúnine arnap daıyndadyq, - dedi Ulttyq ortalyq mýzeıdiń dırektory Serjan Sarov.
Bıyl aktsııa baǵdarlamasyna «Masatydaı qulpyrǵan…» kórmesi engizildi. Onda túkti jáne túksiz kilemder, qabyrǵa kilemderi men HH ǵasyrdyń basyndaǵy sırek toqyma buıymdary qoıylady. Negizgi eksponattyń qatarynda áıgili «Syr kilem» nemese «Qońyrat kilem» bar. Sondaı-aq mýzeıde «Biregeı!» kórmesi ótedi onda asyl metaldardan jasalǵan antıkvarlyq buıymdar, XII ǵasyrdaǵy saǵattar men shyraǵdandar kollektsııasy, sırek farfor men qysh, keskindeme týyndylary men tuńǵys baqsysynyń kıimi kórsetiledi. Odan bólek Qazaqstannyń ártúrli tarıhı kezeńindegi sport, mádenıet, bilim men qoǵamdyq ómirmen baılanysty tósbelgiler men belgiler kórmesi de uıymdastyrylady.
Serjan Sarov «Qazaq» radıosynyń 105 jyldyǵy men «Shalqar» radıosynyń 60 jyldyǵyna oraı «Ulttyń únbaıraǵy» atty mereıtoılyq kórme ashylatynyn atap ótti. Sonymen qatar Muhtar Áýezov atyndaǵy Qazaq ulttyq drama teatrynyń 100 jyldyǵyna oraı «Ǵasyr jasaǵan ult teatry» kórmesi daıyndalyp jatyr.
– Qonaqtarymyzdy Altyn adam, Tomırıs patshaıym, baqsylar, qazaq handary men Aldar Kóse kútip alady. Balalar úshin Qazaq memlekettik tsırkiniń arnaýly shoý-baǵdarlamasy daıyndaldy, sondaı-aq «Qazaqfılm» qorynan kıno kórsetiledi, - dedi Serjan Sarov.
Qasteev mýzeıi
Ábilhan Qasteev atyndaǵy Ulttyq óner mýzeıi de «Mýzeı túnine» oraı úlken baǵdarlama daıyndap otyr. Bul týraly mekeme dırektorynyń orynbasary Móldir Bıgeldıeva aıtty.
– Saǵat 16:00-den 24:00-ge deıin qonaqtardy mýzykalyq shoýlar, performanstar, kvestter men basqa da mádenı is-sharadan turatyn mazmundy baǵdarlama kútedi. Mýzeı qonaqtaryna tosynsyı da bar, ázirge qupııa bolyp qalsyn, - dedi ol.
«Mýzeı túni» aktsııasy birden eki formatta – mýzeıdiń kórme zaldary men mýzeı aýlasyndaǵy open air alańynda ótedi.
Baǵdarlama aıasynda mýzeı qorynan daıyndalǵan jáne «Samuryq-Qazyna Trast» qorynyń 10 jyldyǵyna arnalǵan «Jeti qazyna» kórmesi ashylady. Balalar men jasóspirimder úshin «Jeti qazyna» atty ınteraktıvti kvest uıymdastyrylady. Sondaı-aq mýzykanttar, etno-oryndaýshylar, ártister men shyǵarmashylyq ujymdar óner kórsetedi.
Almaty mýzeıler birlestigi
Almaty mýzeıler birlestigi dırektorynyń orynbasary Rústem Qaıratuly 18 mamyrda birlestik quramyna kiretin barlyq mýzeıge kirý tegin bolatynyn atap ótti.
Olardyń qatarynda:
– Almaty mýzeıi;
– Yqylas atyndaǵy halyq mýzykalyq aspaptar mýzeıi;
– Nurǵısa Tilendıev memorıaldy mýzeıi;
– Mýltımedıalyq dástúrli mýzyka ortalyǵy;
– Dinmuhamed Qonaev memorıaldy mýzeıi;
– Sábıt Muqanovtyń ádebı-memorıaldy mýzeı-úıi;
– Ǵabıt Músirepov ádebı-memorıaldy mýzeı-úıi;
– Ahmet Baıtursynulynyń mýzeı-úıi;
– Almaty galereıasy bar.
«Mýzeı túni – 2026» aktsııasy aıasynda mýzeıler 18 mamyr kúni saǵat 10:00-den 00:00-ge deıin jumys isteıdi. Negizgi keshki baǵdarlama saǵat 18:00-den tún ortasyna deıin ótedi.
Almaty mýzeıi alańynda Asanáli Áshimov teatrynyń «Almaty – mahabbatym» qoıylymy ótedi. Ǵabıt Músirepovtiń ádebı-memorıaldyq úı-mýzeıinde «Qozy Kórpesh – Baıan sulý» spektakli usynylsa, Sábıt Muqanovtyń ádebı-memorıaldyq úı-mýzeıinde «Móldir mahabbat» qoıylymy sahnalanady.
Sonymen qatar mýzeılerde kórmeler ashylady. Olardyń qatarynda saq jaýyngeriniń ǵylymı rekonstrýktsııasy, Merýert Ótekeshovanyń 75 jyldyǵyna arnalǵan «Qazaq kınosynyń jaýhary – Qyz Jibek» kórmesi, sondaı-aq Yqylas atyndaǵy halyq mýzykalyq aspaptar mýzeıiniń 45 jyldyǵyna arnalǵan kórme bar.
Aktsııa aıasynda turǵyndar mýzeıge óz zattary men kóne dúnıelerdi tapsyra alatyn «Mýzeıge syı» jobasy men tanymal tulǵalar qatysatyn «Juldyzdy gıd» jobasy ótpek.
Qonaqtar úshin «Sazgen sazy», «Arqaıym», «Parasat» etno-folklorlyq ujymdary, Kalifarniya, Bayansulu, «Alataý serileri» men «Alashuly» toptary, Janar Aıjanova, Medeý Arynbaev, Aıdana Medenova, IL Canto kvarteti, Talǵat Ábýǵazy men Murat Ábýǵazy, Elza Karabalına, Ardaq Isataeva qatysatyn kontsert, ashyq aspan astyndaǵy kıno kórsetilimi, qysh óneri, mýzykalyq aspap jasaý men beıneleý óneri boıynsha shyǵarmashylyq sheberlik sabaqtary uıymdastyrylady.
Eske salaıyq, Jambyl oblysynda áıgili qara kempirdiń mýzeıi ashyldy.
