Muzda balyq aýlaǵanda qaýipti jerlerdi qalaı anyqtaýǵa bolady

ÓSKEMEN. QazAqparat – Shyǵys Qazaqstan oblysynyń qutqarýshylary muzda balyq aýlaǵanda qaýipti jerlerdi qalaı anyqtaýǵa bolatynyn aıtty, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, qysta balyq aýlaýǵa barǵanda eń birinshi asyqpaý kerek.

«Qalyńdyǵy keminde 10 sm muzǵa shyǵyńyz. Al jeńil avtokólikpen júrgende muz qalyńdyǵy 30 sm-dan asýy qajet. Muz bop qatqan sý qoımasynyń ústindegi qaýipti jerlerdi anyqtaýdyń birqatar joly bar. Atap aıtqanda:

- qalyń qar qabatymen jabylǵan jerler;

- bulaqtary bar ýchaskeler;

- jer betine shyǵatyn butalary, shópteri bar ýchaskeler;

- aǵyndy sýlar quıatyn jerlerde muz juqa bolady», - deıdi qutqarýshylar.

Muz ústinde balyq aýlaý óte qaýipti. Balalar jáne muz ústinde kólikpen kele jatqanda marshrýtty qysqartqysy keletinder jıi muz astyna qulap jatady.

«Shyǵys Qazaqstanda muzdaǵy oqys oqıǵalardyń aldyn alý maqsatynda qutqarýshylar, eriktiler jáne polıtseıler birlesip, sý aıdyndarynda 486 patrýldeý júrgizdi. Turǵyndarǵa 355 nusqama ótkizilip, 4522 úgit-nasıhat jadynamasy taratyldy. Óńir boıynsha sý aıdyndarynda 18 eskertý jáne tyıym salý belgisi ornatylǵan», - deıdi oblystyq TJD Azamattyq qorǵanys basqarmasynyń bastyǵy Rýslan Orynbekov.