Murat Nasımov: «Bilim ekonomıkasy» - serpindi damýdyń negizi
«Atqarylatyn jumystardyń barlyǵy bes ınstıtýtsıonaldyq reforma jáne Ult josparyn júzege asyrýmen baılanysty ekendigi negizdelip otyr», - dedi saıası ǵylymdarynyń kandıdaty, qaýymdastyrylǵan professor, Qyzylorda «Bolashaq» ýnıversıtetiniń oqytýshysy Murat Nasımov QazAqparat tilshisine.
«Memleket basshysy «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Joldaýynda saıası reformalar óz retimen júrip, irgeli qaǵıdalary eldiń qoǵamdyq-saıası jańǵyrýy negizinde sátti ekonomıkalyq reformalardy júrgizýmen baılanystyrdy. Jarııa quqyq pen saıası zertteýler negizderine súıenip, esep beretin Úkimet ınstıtýttary men tetikterin anyqtaý qajet. Rasynda saıası júıeniń bul formýlasy qazirgi kúrdeli jahandyq ahýaldaǵy elimizdiń muqtajdyǵyn qanaǵattandyryp, strategııalyq mindetterdi júzege asyrýǵa yqpal jasaıdy.
Prezıdent azamattardyń quqyqtary men qaýipsizdigin qamtamasyz etý úshin birneshe máselelerge erekshe toqtaldy. Azamattardyń quqyqtary men qaýipsizdigin qorǵaýdyń basty faktory retinde sot jáne quqyq qorǵaý júıelerin tereń reformalaý qajettiligine nazar aýdardy. Qoǵamda keńinen taralyp ketken qylmys túrlerin atap kórsetip, Parlament pen Úkimetke jedel túrde aýyr qylmystarǵa jazany qataıtýdy tapsyrdy. Sybaılas jemqorlyqpen júıeli kúres te nazardan tys qalmady», - dedi Murat Nasımov.
Onyń aıtýynsha, Memleket basshysy qarqyndy damyǵan jáne ınklıýzıvti ekonomıkada qurylymdyq ózgerister jasaýdyń segiz mindetin atap kórsetti. «Bilim ekonomıkasy» aqparattyq qoǵam men bilim qoǵamyna tán postındýstrıaldy ekonomıka men ınnovatsııalyq ekonomıkanyń damýyndaǵy joǵarǵy kezeń ekeni belgili.
«Búgingi álemdik qaýymdastyqtaǵy aldyńǵy qatarly elder jer qoınaýyndaǵy qazbalardy emes, adamnyń aqyl-oıyn basty baılyq sanaıdy. Sondyqtan osy «Bilim ekonomıkasy» qaǵıdalaryna súıený arqyly Ortalyq Azııadaǵy bedelimizdi arttyrý strategııalyq mindetin júzege asyra alamyz. Qysqasha aıtqanda, «bilim ekonomıkasy» - serpindi damýdyń negizi.
Memleket basshysy búgingi tańda áleýmettik jelilerde erekshe mán berilip kele jatqan jer máselesine toqtalyp, jerimizdi sheteldikterge satýǵa jol berilmeıtindigin atap kórsetti. Halyq baılyǵy - jerdi tıimdi paıdalanýdyń tetikterin usynýdy Úkimet pen Parlamentke mindettedi. Bul tetikter otandyq agrarlyq-ónerkásiptik keshenniń sapaly damýyna septigin tıgizetindigine senimdimiz», - dedi Murat Nasımov.
Murat Nasımov Prezıdent áleýmettik jańǵyrýdyń jańa kezeńin bastaýdyń alty baǵytyna erekshe mán bergenin atap ótti. Bilim berý sapasyn jaqsartý úshin jasalǵan usynystarmen qatar, jastar, az qamtylǵan jáne kópbalaly otbasylardy qoldaý bildirý qajettiligin dáıekteıdi.
«Elimizdegi joǵary bilimniń sapasyna jeke toqtalyp, onda oryn alyp júrgen keleńsiz máselelerdiń ońdy sheshilýine jaǵdaı jasaý arqyly bilim sapasyn arttyrýǵa jol ashylatyny belgili. Memleket basshysynyń ulttyń ilgeri damýy úshin qajetti ǵylymnyń róline toqtalýy saladaǵy kóptegen máselelerdiń ret-retimen sheshiletinine senim uıalatady. Ǵylymı jumystardyń júrgizilýi jáne onyń tájirıbede qoldanýy mańyzdy másele. Ásirese, qoǵam músheleri úshin tıimdiligi kóp kórine bermeıtin áleýmettik-gýmanıtarlyq ǵylymdardaǵy zertteýlerdi qoǵamdyq qubylystarǵa saı júrgizýge erekshe mán berýimiz qajet. Bilim berý, ǵylymı máselelermen qatar, medıtsınalyq qyzmet sapasy men qoljetimdiligin qamtamasyz etý, mádenıet qyzmetkerlerin qoldaý, áleýmettik kómek berý júıesin jetildirý boıynsha jumystar júrgiziletin boldy.
Prezıdent Qýatty óńirler – Qýatty el baǵytynda tórt mindetti júzege asyrýdy tapsyrdy. Jergilikti bılik organdary jumysynyń tıimdiligin arttyrý maqsatynda turǵyndar tarapynan jergilikti bılik jumysynyń tıimdiligin baǵalaý júıesin engizý qajettiligine toqtaldy. Mundaı baǵalaýlar áleýmettik jelilerde, ásirese feık-paraqsha qoldanýshylar arasynda jaǵymsyz jáıtter keńinen tarap jatqandyǵyn baıqaýdamyz. Bul sharany júzege asyrý úshin táýelsiz sarapshylardy tartqandy jón sanaımyz. Biryńǵaı turǵyn úı saıasatyn júzege asyrý arqyly áleýmettik turǵydan álsiz toptar úshin baspananyń qoljetimdiligin arttyrý negizgi qaǵıdaty aıqyndaldy.
Bizdiń oıymyzsha, bılik pen qoǵam arasyndaǵy syndarly dıalog árdaıym halyq arasynda suranysta. Joldaýda aıtylǵan qoǵamdyq dıalogtyń maqsaty bıliktiń joǵarǵy deńgeıdegi ashyqtyǵy jáne halyq qajettilikterin qanaǵattandyrýǵa jedel jaýap berý dep oılaımyz», - dedi Murat Nasımov.
