Munaı baǵasy qaıtadan 100 dollardan asty
ASTANA. KAZINFORM – Donald Tramp AQSh «Ormýz buǵazyna kirýge nemese shyǵýǵa tyrysatyn barlyq kemelerdi» buǵattaıtynyn jarııalaǵannan keıin munaı baǵasy taǵy da barreline 100 dollardan asty, dep habarlaıdy BBC.
Brent markaly munaı baǵasy 7,3%-ǵa ósip, 102,30 dollarǵa jetti, al AQSh-tyń WTI markaly munaı fıýchersteri 8%-dan astamǵa ósip, barreline 104,80 dollardy qurady.
AQSh pen Izraıldiń shabýyldary saldarynan Iran álemdegi munaı men tabıǵı gaz qorynyń shamamen besten bir bóligi ótetin Ormýz buǵazyn is júzinde buǵattalatynyn málimdegeli beri munaı baǵasy turaqty túrde ózgerip otyrdy.
Ótken sársenbide Vashıngton men Tegeran Ormýz buǵazy arqyly ótetin negizgi saýda jolyn ashýdy qamtıtyn atysty shartty túrde eki aptaǵa toqtatýǵa keliskennen keıin munaı baǵasy 100 dollardan tómen tústi.
Alaıda demalys kúnderi ótken kelissózdiń sátsiz aıaqtalýy jahandyq energetıkalyq daǵdarystyń ýshyǵyp ketýine qatysty alańdaýshylyq týdyrdy.
- Munaı baǵasy joǵary bolyp qalýy múmkin, sebebi qazir kútiletin nátıjeler blokadanyń tolyq júzege asyrylýyna, keme qatynasyndaǵy úzilisterdiń taralýyna jáne dıplomatııanyń qaıta bastalýyna baılanysty, - dedi Sıngapýrdaǵy Nanıan tehnologııalyq ýnıversıtetiniń ekonomısi Chýa Ieoý Hvı.
Qor naryǵyndaǵy jaǵdaı
Dúısenbi tańerteńgi saýda-sattyq kezinde Azııanyń negizgi qor ındeksteri tómendedi. Japonııanyń Nikkei 225 ındeksi 1%-ǵa, al Ońtústik Koreıanyń Kospi ındeksi – 0,8%-ǵa tómendedi. Azııa elderi Iranmen soǵystyń saldarynan ásirese qatty zardap shekti, sebebi olar Taıaý Shyǵystan keletin munaıǵa qatty táýeldi.
CNN jazýynsha, Tramptyń Ormýz buǵazyn buǵattaý jospary amerıkalyqtar úshin qymbatqa soǵýy múmkin: eger munaı baǵasy kóterilse, benzın baǵasy joǵary bolyp qala beredi. Jeksenbi kúni AQSh-ta bir gallon benzınniń baǵasy demalys kúnderi baǵanyń azdap tómendeýine qaramastan ortasha eseppen 4,12 dollardy qurady. Bul qaqtyǵystyń basyndaǵy kórsetkishten 38 paıyz kóp.
Osyǵan deıin Amerıkanyń Qarýly kúshteri 13 sáýirden bastap AQSh Ortalyq qolbasshylyǵy (CENTCOM) «teńiz blokadasy» dep ataǵan áreketterge kirisetinin jazdyq. Bul sharalar Iran porttarymen baılanysy bar barlyq kemeniń qozǵalysyn shekteýge baǵyttalǵan.
- Bul ereje «Iran porttary men jaǵalaý aımaqtaryna kiretin nemese shyǵatyn barlyq elderdiń kemelerine beıtarap qoldanylady», - delingen Ortalyq qolbasshylyqtyń áleýmettik jelidegi habarlamasynda.
Jaýap retinde Iran Islam revolıýtsııasy saqshylar korpýsynyń áskerı-teńiz kúshteri buǵazǵa jaqyndaǵan kez kelgen áskerı kemeler Vashıngton men Tegeran arasyndaǵy atysty toqtatýdy buzýshylar bolyp sanalatynyn jáne «qatań jazalanatynyn» málimdedi.