Múmkindigi shekteýli jandar tek járdemaqymen kúneltpeı, óz kásipterin bastasa - ekinshi toptaǵy múgedek Álimjan Quralov
Álimjan Quralov on jyl buryn bir mekemede júrgizýshi-mehanık bolyp jumys istep júrip, óndiristik jaraqat alady. 43 jastaǵy azamattyń ústine aýyr júk qulap, eki aıaǵy júrmeı qalǵan. Sol kezeńderde ol ońaltý ortalyǵynda jatyp, ózi sekildi taǵdyrlastarymen birge serýendep shyqpaq bolypty. Alaıda taksı retinde kelgen kólikter qolarbaǵa tańylǵan jandardy suraǵan jerge jetkizip salýdan bas tartady. Sodan ol azdap aıaǵyna turǵan soń, múgedekter úshin eń qajetti degen osy qyzmet túrin qolǵa alýdy oılastyrǵanyn aıtady.
«Dalaǵa shyǵyp taksı toqtatsaq, júrgizýshiler aıaqpen júretinderdi alamyn. Kolıaskamen júrgenderdi mingizbeımin deıdi. Ekinshi taksı shaqyrdyq, olar da solaı jetkizýden bas tartty. Barlyǵynyń aıtatyndary, olardy arnaıy taksı tasymaldaý qajet. Sonda úsheýmiz qaltamyzda aqsha bar, biraq jetetin jerge jete almaıtynymyzǵa ishimiz ashydy. Al, saý adamdar qalaǵan kóligimen, qalaǵan jerine jete beredi»,- deıdi Álimjan Quralov.
Osydan keıin Álimjan Quralov istiń sheshimin tabý úshin 2019 jyly «Atameken» baǵdarlamasymen oqyp, ınvotaksı ashý úshin bıznes-jospar túzedi. Oǵan sáıkes múgedek azamat Reseıden shyǵatyn alty oryndyq jańa kólikti múgedek jandardyń minýine yńǵaıly etip jasap, taksı qyzmetin kórsetpek bolatyn. Osy maqsatta jobany qarjylandyrýdy surap, aýdan ákimdigine tapsyrady. Alaıda jergilikti bılik ókilderi bul jobany tolyq qanaǵattandyrmaı, bar bolǵany 250 myń teńge ǵana bóledi. Budan keıin qajyrly azamat óziniń jeńil kóligin satyp, áıeline nesıe aldyrtady. Qolyndaǵy aqshasy jetpegen soń «Atamekenniń» grantyna ótinish bildirgen. Biraq ol da ótpeı qalǵan.
Aıta keteıik, Saıram aýdanynda 9 myń múgedek turady. Olarǵa arnalǵan arnaıy taksı qyzmetimen 30-aq adam júredi. Bárine kólik jetpeıdi. Onyń ózinde emhana, Halyqqa qyzmet kórsetý ortalyǵy sekildi nysandarǵa ǵana barady. Keshki saǵat 17:00-den keıin ol qyzmet túri toqtaıdy. Bir birine qonaqqa barýǵa, serýendeýge shyǵa almaıdy.
Álimjannyń aıtýynsha, múmkindigi shekteýli jandar osy syndy kóptegen kedergilerge tap bolady. Al, segiz oryndyq jeńil kólikke pandýs qoıýǵa, múgedekterge arnap jasaýǵa zań boıynsha ruqsat berilmeıdi. Ol kólik túrli synaqtardan ótpegen soń tirkeýge de alynbaıtyn bolyp shyqty. Arnaıy sertıfıkaty, ruqsat qaǵazy da qajet eken. Joba avtory osydan keıin bastapqy jobaǵa ózgeris engizedi.
«Men sııaqty qyz-jigitterdiń basym kópshiligi tirshilik istegisi, kásip ashqysy keledi. Qoǵamǵa qosylǵysy keledi. Alaıda qujattaryn tirkep, anyqtama alýǵa, olardyń júrip turýyna kólik joq. Sodan qatty qınalyp jatady. Osydan keıin men bıznes jobamdy ózgertip, qaıta grantqa usyndym. Nátıjesinde 4 mln teńge utyp aldym. Biraq Reseıdegi kólik shyǵaratyn zaýyt ókilderi bizge qajet kólik bes mln teńge turatynyn, ony múgedekterge arnap jabdyqtaýmen 8,5 mln bolatynyn aıtty. Kóliktiń ishki syzbalaryn ózimiz jasap jiberdik», - deıdi Álimjan Quralov.
Saıramdyq turǵyn qalǵan 4,5 mln teńgeni demeýshiler men kásipkerler, janashyr azamattar esebinen tolyqtyryp alady. Sóıtip Nıjnıı novgorod qalasyndaǵy zaýytqa tapsyrys berip, sý jańa kólikti ózi aıdap ákelipti. Kelgennen keıin de 1 mln teńge kólemindegi ýtıl alymdy burynǵy depýtat Aıgúl Soloveva tólep bergen.
«Kólikti alyp kelgennen keıin jeke kásipker retinde tirkelip, kásibimdi bastap kettim. Qoǵamdyq jumystan bir azamatty qasyma alyp, eki aıdan beri tasymaldap jatyrmyn. Áleýmettik jelilerde keńinen nasıhattap, sonyń arqasynda osy qyzmet túrine júginetinder kóbeıdi. Múmkindigi shekteýli jolaýshylar aldyn ala bir kúnge tapsyrys beredi. Baǵasy da olar úshin qoljetimdi. Kúnine bes- alty myń teńgedeı tabys tabamyn. Kádimgi basqa taksılerden áldeqaıda arzan.
Endi tek qolarbaǵa tańylǵandar emes, jatyp qalǵan múgedekterge arnalǵan kólikti jabdyqtap alsam degen josparym bar. Mysaly aýdandaǵy túrli mekemelerde pandýstar joq. Nege qoımaısyńdar desek qajettiligi joq, ondaı adamdar kelmeıdi de deıdi. Al, múgedekter kelýi úshin kólikter kóbeıýi kerek shyǵar. Meniń basty maqsatym-qoǵamda múmkindigi shekteýli jandar shet qalmaı, saý adamdardaı barlyǵyna qol jetkize alatynyn dáleldegim keledi. Olar tek járdemaqymen kúneltpeı, óz kásipterin bastasa jáne tabys tapsa dep armandaımyn. Óıtkeni, olardyń da bul jumystardy atqarýǵa qarym qabileti ábden jetedi», - deıdi joba avtory.
Álimjan Quralov osyndaı jeke ınvataksı qyzmeti barlyq aýdan-qalada bolýy kerek dep sanaıdy. Mundaı taksılerdiń sany kóbeıse, múgedekterdiń ómirge beıimdelýi arta túsetin edi dep sanaıdy. Al, ázirge ol júrgizýshi jáne dıspetcher qyzmetin jolǵa qoımaq. Bul jumystarǵa aýdan ákimshiligi de kómek qolyn sozatyn bolyp, Álimjan Quralovtyń bıznes-josparyn qarastyrýdy kózdep otyr.
