Múlikteri búlinse de úmitteri úzilmegen qostanaılyqtar
Naýryz aıynyń sońynan beri Qostanaı oblysy joıqyn sý tasqynynan zardap shekti. Tabıǵat apaty eń áýeli oblystyń ońtústigindegi Amangeldi, Jangeldi aýdandary jáne Arqalyq qalasy turǵyndaryn ábigerge saldy. Al 5 sáýirde sý tasqyny oblys ortalyǵyna, jaqyn mańdaǵy aýdandar men eldi mekenderde «minez tanytty». Kazinform tilshisi sý tasqynynan zardap shegip, múlikteri búlinse de úmitteri úzilmegen Tobyl qalasynyń turǵyndarymen kezdesti.
Evakýatsııalyq pýnktterdiń biri N. Naýshabaeva atyndaǵy mektep-gımnazııasynda ornalasqan. Munda 113 adamǵa oryn bar. Qazirgi ýaqytta 30-ǵa jýyq er, áıel men bala ýaqytsha ornalastyrylǵan. Olar – bógetke irgeles kóshelerdiń turǵyndary.
Zeınetker Nadejda Krasıkova sý tasqyny qyr kórsetpeı turyp mektepke jaıǵasyp alǵan. Ol sýdyń úıge jaqyndamaǵanyna shúkir etip otyr.
«Evakýatsııa jarııalanǵan ýaqytta mektepke keldik. Bógetti der kezinde nyǵaıtqandyqtan úıimdi sý basqan joq. Osy rette, ákimdikke, jergilikti turǵyndarǵa alǵysymdy bildiremin», - deıdi zeınetker.
Qala turǵynynyń aıtýynsha, mundaı sý tasqyny buǵan deıin 1994 jyly bolǵan. Ol kezde bóget bolmapty. Sol ýaqytta jeke úıler ǵana emes, eki qabatty úılerdiń birinshi qabaty da sý astynda qalǵan. Qazir zeınetker úıi men ıtiniń qamyn oılap otyr.
«Itime tamaq berýge baryp edim, aıanyshty kúıde eken. Óz úıimizge oralýymyzdy taǵatsyzdana kútip júrmiz», - dedi ol.
Qostanaı aýdanynda barlyǵy 7 evakýatsııalyq pýnkt bar. Ondaǵy tósek-oryn sany 1 000-ǵa jýyqtaıdy. Qazirgi ýaqytta shamamen 134 adam evakýatsııalanǵan. Al, jalpy Qostanaı oblysynda mundaı 20 ortalyq tirkelgen.
Turǵyndarǵa kúnine 4 ret tamaq beriledi. Olar taǵamnyń óte dámdi ekenin atap ótti. Mysaly, túski asqa sorpa, et qosylǵan buqtyrylǵan kókónister, kompot beriledi eken. Aıtpaqshy, tamaqty jergilikti mektep jetkizýshisi tegin úlestiriletinin atap ótken jón. Evakýatsııalyq pýnktterde áıelder men erlerge arnalǵan tósek-oryndary bólek, tipti, sábıge arnalǵan besik te bar eken.
Ókinishke qaraı, bizge tasqynnan barynan aıyrylǵandar da kezdesti. Valentına men Anatolıı Zınovevter baspanasynyń jaramsyz kúıge túskenin aıtady. Olar sonaý 90-jyldardyń sońynan bastap jaıly úıge aınalǵan saıajaıda turyp kelgen. Búginde olardyń úıi sý tasqynynan zardap shekken nysandardyń qataryna engen. Barlyq múlik sý astynda qalǵan...
«Biz Keńes Odaǵy kezinde Reseıden kóship kelgenbiz. 1999 jyly bir jerde Zatobolovkanyń (qazirgi Tobyl qalasy – avtor) túbindegi saıajaılarǵa qonystandyq. Mundaı sý tasqynyn alǵash ret bastan keship otyrmyz. Ókinishti jaǵdaı. Bar múlik sý astynda qaldy. Qujattardy ǵana alyp úlgerdik», - dedi Valentına.
Aıtpaqshy, ol áńgimelesýge deıin dárigerge kórinip kelipti. Ýaıymnan bolar, densaýlyǵy syr bere bastaǵan.
«Olar bizge «bárine kómektesemiz» dep ýáde berdi. Saıajaıda turyp jatqandarǵa baspana beretinin aıtty», - deıdi erli-zaıyptylar.
Aıta ketsek, Qostanaıda tasqynnan zardap shekkenderge 114 mln teńge birjolǵy tólem berildi.
