Muhtar Tileýberdi Shveıtsarııa Federaldyq Jınalysy Ulttyq Keńesiniń Tóraǵasymen kezdesti

NUR-SULTAN. QazAqparat - Qazaqstan Premer-Mınıstriniń orynbasary – Syrtqy ister mınıstri Muhtar Tileýberdi Qazaqstanǵa resmı saparymen kelgen Shveıtsarııa Konfederatsııasy Federaldyq Jınalysy Ulttyq Keńesiniń Tóraǵasy Andreas Ebımen kezdesti, dep habarlaıdy QazAqparat QR SІM resmı saıtyna silteme jasap.

Taraptar COVID-19 pandemııasyna qaramastan, Qazaqstan men Shveıtsarııa ekijaqty kún tártibiniń barlyq spektri boıynsha belsendi ózara is-qımyldy jalǵastyryp jatqanyn qanaǵattanýshylyqpen atap ótti. Joǵary deńgeıdegi saıası dıalog ornatylǵan: memleket basshylarynyń mamyr aıynyń sońynda beınekonferentsııa formatyndaǵy kelissózderi, QR Prezıdenti Q.Toqaevtyń Shveıtsarııaǵa resmı sapary josparlanýda.

Shveıtsarııa ókiletti bıznes-delegatsııasynyń 2021 jylǵy mamyrdaǵy Qazaqstanǵa saparynyń qorytyndylary jáne Іskerlik Keńestiń qyzmeti talqylandy.

Ekijaqty yntymaqtastyqty nyǵaıtýdaǵy parlamenttik dıplomatııanyń mańyzdylyǵy atap ótildi. Taraptar «Qazaqstan – Shveıtsarııa» parlamentaralyq yntymaqtastyq toby aıasynda eki el parlamentshileriniń belsendi ózara is-qımylyn quptady.

Shveıtsarııa qazirgi ýaqytta Qazaqstan ekonomıkasynyń kólemi boıynsha úshinshi ınvestor, onda búginde shveıtsarııalyq kapıtaldyń qatysýymen 400-den astam kompanııa jumys isteıdi.