Muhtar Tileýberdi Nıý-Iorkte «S5+1» mınıstrlik kezdesýine qatysty

NЬıÝ-IORK. QazAqparat - BUU Bas Assambleıasynyń 76-shy sessııasy sheńberinde Nıý-Iorkte QR Premer-Mınıstriniń orynbasary – Syrtqy ister mınıstri Muhtar Tileýberdi, AQSh Memlekettik hatshysy Entonı Blınken, Qyrǵyzstannyń Syrtqy ister mınıstri Rýslan Kazakbaev, Tájikstannyń Syrtqy ister mınıstri Sırodjıddın Mýhrıddın, Túrikmenstannyń Syrtqy ister mınıstri Rashıd Meredov jáne Ózbekstannyń Syrtqy ister mınıstri Abdýlazız Kamılovtyń qatysýymen «S5+1» mınıstrlik kezdesýi ótti. Bul týraly QazAqparat QR SІM baspasóz qyzmetine silteme jasap habarlaıdy.

Syrtqy saıası vedomstvolardyń basshylary Aýǵanstandaǵy daǵdarysty jaǵdaıdy sheshýde, óńir memleketteriniń COVID-19-ǵa qarsy is-qımyl boıynsha kúsh-jigerin biriktirýdegi, ekonomıkalyq ózara baılanystylyq salasyndaǵy múmkindikterdi iske asyrýdaǵy jáne klımattyq daǵdarysqa qarsy kúrestegi zor áleýetin atap ótip, «S5+1» óńirlik dıplomatııalyq platformasynyń mańyzdylyǵyn rastady. Elden ketkisi keletin sheteldik azamattar men aýǵandyqtardyń qaýipsizdigin qamtamasyz etýdiń jáne Aýǵanstannyń ınklıýzıvti úkimetin qalyptastyrýdyń mańyzdylyǵyn atap ótti.

Qazaqstan SІM basshysy «S5+1» ózin óńirlik qaýipsizdikti talqylaýdyń, Ortalyq Azııa óńiri ishindegi jáne AQSh-ta ózara tıimdi baılanystardy arttyrýdyń turaqty alańy retinde tanytty» dep málimdedi.

Sondaı-aq, kezdesýge qatysýshylar Qazaqstannyń «S5+1» elderiniń tabıǵat qorǵaý vedomstvolary basshylarynyń kezdesýin shaqyrý jónindegi bastamasynyń der kezinde uıymdastyrylǵanyn, olardyń praktıkalyq qorytyndylary ekonomıkalyq ósýdiń qozǵaýshy kúshi bola alatynyn atap ótip, óńirlik energetıkalyq baılanystar men energııa tıimdiligi jaqsarǵan múmkindikterdi atap ótti.

«S5+1» kezdesýi Ortalyq Azııadaǵy jańa syn-qaterler men qaýipterdi, ekologııalyq problemalardy sheshý jónindegi birlesken sharalardy, sondaı-aq óńirlik tásildi talap etetin saýda-ınvestıtsııalyq baılanystardy keńeıtý joldaryn talqylaýǵa múmkindik berdi.

Sondaı-aq, M.Tileýberdi AQSh Memlekettik hatshysynyń Ońtústik jáne Ortalyq Azııa isteri jónindegi kómekshisi Donald Lý jáne AQSh Ulttyq qaýipsizdik keńesiniń Reseı jáne Ortalyq Azııa boıynsha keńsesiniń Aǵa dırektory Erık Grınmen kezdesti.

Kelissózder barysynda ekijaqty, óńirlik jáne halyqaralyq kún tártibindegi keń aýqymdy máseleler, sonyń ishinde asa joǵary jáne joǵary deńgeıdegi baılanystar, Aýǵanstandaǵy aǵymdaǵy jaǵdaı jáne aýǵanaralyq dıalogty ilgeriletý jáne t.b. máseleler talqylandy.