Muhtar Tileýberdi: Qazaqstannyń syrtqy saıasaty óziniń negizgi qaǵıdattaryn ustanýda

NUR-SULTAN. QazAqparat - Qazaqstannyń syrtqy saıası vedomstvosynda akkredıttelgen sheteldik dıplomatııalyq korpýstyń qatysýymen Premer-Mınıstrdiń orynbasary – Syrtqy ister mınıstri Muhtar Tileýberdiniń eldegi qazirgi jaǵdaıǵa arnalǵan brıfıngi ótti, dep habarlaıdy QazAqparat.

M. Tileýberdi óz sózinde 2022 jylǵy qańtar aıynyń basyndaǵy elimizdiń túrli aımaqtaryndaǵy oqıǵalardyń hronologııasyn, sondaı-aq olardyń negizgi saldaryn tanystyrdy. Dıpkorpýsqa oqıǵanyń sebepteri jáne memlekettiń reaktsııasy týraly habarlandy. Ol eldegi jaǵdaı tolyǵymen turaqtanǵanyn, UQShU bitimgerleri mıssııasyn aıaqtaǵanyn atap ótti. Qazaqstannyń syrtqy saıasaty óziniń negizgi qaǵıdattaryn ustanýda. Bizdiń barlyq halyqaralyq mindettemelerimiz tolyq kóleminde qalyp otyr.

Mınıstr 11 qańtarda Parlament májilisinde sóılegen sózinde Prezıdent Qasym-Jomart Toqaevtyń jańadan qurylǵan Úkimettiń aldyna qoıǵan qoǵam men memleket ekonomıkasyn jańartý jónindegi mindetterine egjeı-tegjeıli toqtaldy. Atap aıtqanda, Úkimet otandyq jáne sheteldik ınvestorlar men saýda áriptesteriniń Qazaqstan ekonomıkasyna degen senimin qalpyna keltirý úshin barlyq yqtımal sharalardy qabyldaıdy, ınvestıtsııalyq saıasattyń jańa tujyrymdamasy ázirlenetin bolady.

Óz kezeginde, osy qıyn-qystaý kezeńde Qazaqstan halqymen yntymaqtasa otyryp, shet memleketterdiń dıplomatııalyq mıssııalarynyń basshylary «birinshi aýyzdan» aqparat alýǵa múmkindik bergeni úshin alǵystaryn bildirip, Úkimet pen Memleket basshysynyń oryn alǵan qaıǵyly oqıǵalardan keıin eldi qalpyna keltirý jónindegi kúsh-jigerine qoldaý bildirdi.

Prezıdent Q.Toqaev usynǵan jáne Qazaqstan damýynyń túbegeıli jańa paradıgmasyn qalyptastyrýǵa baǵyttalǵan daǵdarystan keıingi sharalar keshenin iske asyrý jónindegi josparlarǵa erekshe nazar aýdaryldy.

Kezdesý sońynda M. Tileýberdi dıplomatııalyq korpýstyń suraqtaryna tolyq jaýap berdi.