Muhtar Tileýberdi Germanııa Syrtqy ister mınıstrimen kezdesti

ASTANA. QazAqparat – Germanııa delegatsııasynyń Qazaqstanǵa sapary ekonomıkalyq yntymaqtastyq pen saıası dıalogqa qosymsha serpin beredi. Bul týraly búgin elordada Qazaqstan Premer-Mınıstriniń orynbasary – Syrtqy ister mınıstri Muhtar Tileýberdi aıtty, dep habarlaıdy QazAqparat tilshisi.

«Búgin biz Germanııanyń Federaldyq Syrtqy ister mınıstri Annalena Berbok ekeýmiz nátıjeli ári senimdi kelissózder ótkizdik. Biz ekijaqty saıası, ekonomıkalyq jáne mádenı-gýmanıtarlyq baılanystardyń qazirgi jaı-kúıi men olardy tereńdetý múmkindikterin talqyladyq, sondaı-aq halyqaralyq kún tártibindegi birqatar másele boıynsha pikir almastyq. Qazaqstan men Germanııa arasyndaǵy dıplomatııalyq qarym-qatynastardyń 30-jyldyǵy aıasynda biz senimdi saıası dıalog pen saýda-ekonomıkalyq jáne ınvestıtsııalyq salalardaǵy turaqty ári ózara tıimdi yntymaqtastyqtyń joǵary deńgeıin atap óttik», - dedi M. Tileýberdi Germanııanyń Federaldyq Syrtqy ister mınıstrimen kezdesýden keıin.

Osy oraıda mınıstr kópvektorly syrtqy saıası baǵytymyzdyń sabaqtastyǵy aıasynda Germanııamen jáne jalpy Eýropa Odaǵymen ózara is-qımyl qadamdaryn damytýǵa ekpin qoıylyp otyrǵanyn aaıtty.

«Berbok hanym, Sizdiń saparyńyz elder arasyndaǵy ekonomıkalyq yntymaqtastyq pen saıası dıalogqa, sondaı-aq halyqaralyq baılanystardy jandandyrýǵa qosymsha serpin beretinine senimdimin.

Biz Germanııa Býndestag depýtattarynyń kelgenine jáne olardyń Qazaqstan Parlamenti ókilderimen kezdesýine qýanyshtymyz. Parlamentarızmdi damytý máseleleri boıynsha, ásirese, elde ádiletti Qazaqstandy qurýǵa baǵyttalǵan aýqymdy saıası jáne áleýmettik reformalar aıasynda belsendi pikir jáne tájirıbe almasylatynyna senimdimin. Sonymen qatar, biz Germanııa ekonomıkasynyń jetekshi sektorlarynyń ókilderi kiretin iri bıznes delegatsııanyń kelgenine rızashylyǵymyzdy bildiremiz», - dedi Muhtar Tileýberdi.