Muhtar Erbaıan Túrkııaǵa emdelýge jiberildi
ASTANA. KAZINFORM — Densaýlyq saqtaý mınıstrligi 2023 jyly áskerı qyzmetti ótkerý kezinde aýyr bas súıek-mı jaraqatyn alǵan Ulttyq ulanynyń burynǵy áskerı qyzmetshisi Muhtar Erbaıannyń Túrkııaǵa emdelýge jiberilgeni týraly habarlaıdy.
— Komıssııanyń jumys organynyń sheshimimen neıromodýlıatorlyq em júrgizý jáne patsıenttiń somatıkalyq mártebesin saqtaý úshin Medipol Global klınıkasyna (Túrkııa) emdelýge Muhtar Erbaıandy jiberý maquldandy, — delingen habarlamada.
Buǵan deıin Qazaqstanda Muhtar Erbaıan Almaty qalasynyń Ortalyq qalalyq klınıkalyq aýrýhanasynda jáne Astanadaǵy Ulttyq neırohırýrgııa ortalyǵynda em alǵan bolatyn. 2024 jyldyń tamyzynan bastap 2025 jyldyń qańtaryna deıin otbasynyń qoldaýymen Túrkııada qalpyna keltirý eminen ótti. Qazaqstanǵa oralǵannan keıin mamandardyń baqylaýynda boldy jáne úıde medıtsınalyq kómek aldy.
— Patsıentti Astanadan Ystanbulǵa tasymaldaý Іshki ister mınıstrliginiń bortynda, DSM Ulttyq shuǵyl medıtsına úılestirý ortalyǵynyń mobıldik brıgadasynyń medıtsınalyq súıemeldeýimen júzege asyryldy. Kelgennen keıin patsıentti klınıka ókilderi qarsy aldy. Patsıenttiń jaǵdaıy turaqty, traheostomııada, — delingen mınıstrlik habarlamasynda.
Eske sala keteıik, Erbaıan áskerge óz erkimen baryp, birneshe aıdan keıin Almatydaǵy 5571 áskerı bóliminde bas súıek-mı jaraqatyn alǵan bolatyn.
Qatardaǵy jaýynger Erbaıan Muhtar 6 aıdan beri komada jatqanyn jazǵan bolatynbyz.
Ulttyq ulan bólimshesinde merzimdi áskerı qyzmet atqarǵan Erbaıan Muhtardyń komaǵa túsýine janama aýrýlar sebep bolǵanyn áskerı mamandar málimdegen bolatyn. Alaıda, osy tusta Erbaıannyń ata-anasy bul tujyrymmen kelispeıtinderin habarlaǵan edi.